بلوچستان ءَ زورانسری بیگواھیانی ھلاپ ءَ کارکنوکیں گل وائس فار بلوچ مسنگ پرسنز ءِ چئیرمین نصراللہ بلوچ ءَ چاگردی رسانکدر ءِ تندجاہ ٹوئیٹر ءَ گُشتگ کہ بیگواھیں مردمانی کیس بازیں سالاں چہ آمید گِس ءُ کمیشنانی دیم ءَ جُنزگ ءَ اَنت بلے بیگواھیں مردمانی درگت ءَ جی آئی ٹیز، ٹاسک فورس ءُ پارلیمانی کمیٹی ھم اڈ دیگ بیتگ اَنت بلے بازیں سالاں چہ بیگواھیں مردم نہ یل کنگ بیتگ اَنت ءُ نہ کہ زورانسری آوارجنی ءِ درچ اوشتاتگ۔
آئی ءَ گُشتگ کہ انساپ ءِ ھاتر ءَ جوڑ داتگیں گلانی چی پائدگ اگاں آ سانمندیں مردماں انساپ دیگ ءَ بے سوب اَنت۔
زانگ بہ بیت بلوچستان ءَ زورانسری بیگواھیانی جیڑہ چہ بازیں دھکاں ھست اَنت۔
وائس فار بلوچ مسنگ پرسنز ءُ دگہ انسانی ھقانی گلانی رد ءَ اے وھدی چہ بلوچستان ءَ زورانسری آوار جنی ءُ بیگواھی ءِ آماچ بیتگیں سیاسی باسک ءُ نودربرانی کساس ھزارانی تہ ءَ اِنت ءُ بازیں آوار جتگیں سیاسی جھدکارانی جون ھم دست کپتگ اَنت۔
دومی نیمگ ءَ بلوچستان ءِ بنجاھی شھر ءَ جتگیں وائس فار بلوچ مسنگ پرسنز ءِ بنجل لھتیں روچاں کراچی ءَ جنگ بیتگ اِنت۔
گل ءِ کمک کار مستر ماما قدیر بلوچ کراچی ءَ سر بیتگ ءُ آ دہ دسمبر ءَ کراچی پریس کلب ءَ انسانی ھقانی درگت ءَ سیمینار ءَ بھر زیریت۔