ھندوستان ءِ شمال مشرقی اِستان ناگالینڈ ءِ مون دمگ ءِ ھند اوٹنگ ءَ شمبے ءُ یک شمبے ءِ نیامی شپ ءَ پھازگی لشکریانی بیڑ ءِ نیام ءَ بازیں شھریانی کُشگ بیگ ءِ ھال اِنت۔
واکدارانی نیمگ ءَ داں انگت اے گُشگ نہ بیتگ کہ چنچو مردم کُشگ بیتگ اَنت بلے ھندوستان ءِ رسانک ایجنسی پی ٹی آئی ءِ رد ءَ اے بیڑ ءَ کم چہ کم 11 لس مردم بیران بیتگ اَنت۔ وھدیکہ ناگا پیپلز فرنٹ پارٹی ءِ رھشون ءُ اِستان ءِ پیسرگیں سر وزیر ٹی آر۔ زیلیانگ ءِ رد ءَ داں انگت 13 مردم بیران بیتگ اَنت۔
اے وئیل ءِ سر ءَ تھی کارانی وزیر امِت شاہ ءُ استان ءِ سر وزیر اعلیٰ نیفیو ریو ءَ ٹوئیٹ کنان ءَ درد ءُ رنج ءِ درشان کُتگ ءُ گُشتگ کہ یک مزنیں کچے ءِ پَٹ ءُ پولی کمیٹی ءِ اڈ دیگ بہ بیت ۔
استان ءِ سر وزیر نیفیو ریو ءَ ٹوئیٹ کُتگ کہ مون دمگ ءِ ھند اوٹنگ ءَ لس مردمانی کوش سک پدردیں ھال ءُ آ اِشی ءَ ایر جنت۔
وھدیکہ ناگالینڈ ءِ پھازگی واک ڈیفنس ونگ کوہیما ءَ وئیل ءِ درگت ءَ یک درشان ءِ شنگ کنان ءَ گُشتگ کہ ٬ھمے ھند ءَ ناشرکاریں مردمانی اُرش ءِ درگت ءَ سدکیں اھوال بیتگ اَنت کہ اِشی سوب ءَ ناگالینڈ ءِ موم دمگ ءِ تیرو ھنکین ءَ یک بیڑ برگ بیتگ اَت۔ اے وئیل ءَ ھرچے کہ بیتگ اِشی سرءَ ما پھلی لوٹیں۔ اے وئیل ءَ لس مردمانی کوش ءِ درگت ءَ یک مزنیں کچے ءَ پَٹ ءُ پول برجاہ اِنت۔ ءُ قانود ءِ رد ءَ گام زیرگ بنت اِنت۔،
ھال رسانک ایجنسی پی ٹی آئی ءِ رد ءَ ھندوستانی پوج ءَ اے وئیل ءِ سر ءَ دلپدردی ءِ درشان کنان ءَ گُشتگ کہ اے یک دردناکیں وئیل اِنت۔ پوج ءِ نیمگ ءَ شنگ کُتگیں درشان ءِ تہءَ گُشگ بیتگ کہ وئیل درگت ءَ مزنیں کچے ءَ پَٹ ءُ پول کنگ بہ بیت۔ پوج ءَ کورٹ آف انکوائری ءِ پرمان داتگ۔
زانگ بہ بیت کہ مون دمگ ءِ ھند ءَ ناگالینڈ ءِ ٬جنگولیں، گل این ایس سی این (کے) ءُ الفا (یو ایل ایف اے) ءِ بنجاہ زانگ بیت اِنت۔