گوادر ءِ نندانک برجاہ، کوسٹل ھائی وے ءَ ھوار دمگ ءَ باپاری بنجل بند

بلوچستان ءِ تیابدپی شھر گوادر ءَ وتی ھکانی واستا “گوادر ءَ حق دو تحریک “ءِ نندانک مروچی ھژدھمی روچ ءَ برجاہ – لوٹانی پد ءَ مروچی مکران کوسٹل ھائی وے ءِ سر ءَ شھریاں بازیں کچے ءَ زھرشانی کنان ءَ روانی مھتل کتگ اَنت-

دی بلوچستان پتر ھال ءَ سر بیتگیں ھالانی رد ءَ پشمبے ءِ سھب ءَ مکران ءِ کوسٹل ھائی وے اورماڑہ زیروپوائنٹ، پسنی زیروپوائنٹ ءُ سربندن چاراہ بند کنگ بیتگ اَنت- چریشی ءِ سبب ءَ گوادر ءَ کراچی ءَ ھوار بلوچستان ءِ دگہ جاھاں روانی رھوت مھتل بیتگ اَنت –

زھرشانی سبب ءَ ھزارانی مساپر بریں گاڑی نندانکجاہ ءَ سر بیتگ – دومی نیمگ ءَ انجمن تاجران ءِ نیمگ ءَ گوادر، پسنی، جیونج ءُ اورماڑہ ءِ دراھیں باپاری بنجل بند کتگ اَنت –

تھتک بندیں ھرتال ءِ سبب ءَ مالیاتی ادارہ ھم بند ءُ دومی نیمگ ءَ سرکاری کارگساں ملازمانی رو ءُ آہ کم بیتگ گوستگیں شپ ءَ سرکاری کمیٹی ءُ زھرشانی کنوکانی میان ءَ گپ ءُ تران پنچمی بر ءَ بے سوب بیتگ –

زانگ بہ بیت زھرشانی نندانک ءَ گوستگیں شپ ءَ اُستانی وزیر ظھور بلیدی، لالا رشید اتکگ اَنت ءُ مولوی ھدایر الرھمان بلوچ ءَ داں دیراں گپ ءُ تران ءَ پد مولوی ھدایت الرھمان بلوچ ءَ نندانک ءَ نشتگیں مردمانی گون ءَ گپ کنان ءَ گوشتگ کہ مئے لوٹانی تہ ءَ دو لوٹ منّگ بیتگ اَنت –

آئی ءَ گُشتگ اَت کہ سرکاری کمیٹی ءِ باسکاں اے ستک داتگ کہ مروچی کوسٹ گارڈ ءِ دست ءَ گرگ بیتگیں لانچ ءُ کسٹم ءِ دست ءَ گرگ بیتگیں گاڑی یل کنگ بنت ءُ آئی ءَ گُشتگ کہ اے گپانی منگ ءُ سیمسر ءِ پچ کنگ ءَ داں زھرشانی نندانک برجاہ بیت اِنت –

ھدایت الرھمان ءَ گشتگ اَت کہ گوستگیں شپ ءَ بیتگیں شور ءُ سلاھاں اے پیسلہ کنگ نیتگ کہ نندانک برجاہ بیت اِنت ءُ نِی گپ ءُ تران بس سر وزیر بلوچستان، چیف سیکریٹری بلوچستان ءُ کورکمانڈر بلوچستان ءِ گون ءَ بس گپ بیت اِنت –