بلوچستان ءِ دمگ پنجگور ءِ جھمنند بھزاد دلاوری ءِ برات بھروز دلاوری ءَ گُشتگ کہ ھمے سال ءَ 30 نومبر ءَ آئی برات دزگیری ءَ پد بیگواہ کنگ بیتگ۔
آئی رد ءَ بیگاہ ءِ وھدءَ منی برات بھزاد دلاوری پاکستانی لشکریاں چہ چتکان ایف سی کیمپ ءِ نزیک ءَ اولاک ءَ ایر گپتگ دزگیر کُتگ ءُ گوں وت بُرتگ۔
آئی ءَ گُشتگ کہ منی برات گوستگیں پنچ روچاں چہ ایف سی کیمپ ءَ چیریں ادارھانی دزگیری ءَ بیتگ ءُ مارا گُشگ بیتگ کہ جُست ءُ پُرس ءَ پد آئی سر ءَ ھچ پئیمیں جرمکاری منانک دست نہ کپتگ۔
آئی ءَ گُشتگ وھدے پنچ روچ ءَ رند آ یل کنگ بیتگ گُڑا چہ کیمپ ءَ ڈن ءَ در آیگ ءَ گوں آ پدءَ چِست کنگ ءُ ناشناسیں جاھاں برگ بیتگ۔
بھروز دلاوری ءَ گُشتگ کہ بھزاد یک نودربر اِنت کہ CSS ءِ چکاسانی ھاترہ وانگ ءَ بیتگ بلے آ زورانسریں بیگواھی ءِ آماچ کنگ بیتگ۔
آئی ءَ گُشتگ ڈیھی گل وتی رھبند ءَ نہ من اَنت ءُ نہ وتی اڈ کُتگیں قانودانی شرپ ءَ کن اَنت۔
آئی ءَ چہ ملک ءِ مستریں آمید گِس ءُ درستیں قانودی ادارھاں ءَ چہ دزبندی کُتگ کہ اگں منی برات ءَ کجام ھم جرمکاری کُتگ گُڑا آ آمید گِس ءَ آرگ بہ بیت ءُ ما چہ درستیں انسانی اگبالانی گلاں چہ دزبندی کنیں کہ آ منی براتءِ درکنگ ءِ ھاترءَ مئے ھم توار بہ بنت۔