گوادر ءُ ھب ءَ چار بیگواھیں مردم یل کنگ بیتگ اَنت

بلوچستان ءِ تیابدپی شھر گوادر ءَ سَے بیگواھیں مردم یل کنگ بیتگ اَنت –

سر بیتگین اھوالانی رد ءَ گوستگیں روچ ءَ گوادر ءَ زورانسری آوار جنگ بیتگیں سَے مردم انتزامیہ ءِ دست ءَ دیگ بیتگ اَنت – آیانی پجار عارف ء در مھمد، عادل ء نبی بکش ءُ سبی ءِ جھمنندیں ٹنڈو ء لیھو ھوار اَنت –

گوادر ءَ حق دو تحریک ءِ سروک مولوی ھدایت الرھمان بلوچ ءَ ھر سئیں ورنایانی یل بیگ ءِ ھال راست کرتگ ءُ گوشتگ کہ آ پولیس ءِ دست ءَ دیگ بیتگ اَنت ءُ آیانی نبشتی ٹپاسگ ءِ سرجم کنگ ءَ پولیس کارگس ءَ روگ ءَ آں –

زانگ بہ بیر عارف ء درمھمد ےُ دگہ مردمانی دزگیری پولیس ءِ کاؤنٹر ٹیررازم ڈیپارٹمنٹ ءَ بلوچستان ءِ دمگ کیچ ءِ بنجاھی شھر تربت ءَ پدر کرتگ ءُ آیاں بلوچ لبریشب آرمی ءِ ھمے سال ءَ گوادر ءَ چینی انجینئرانی سر ءَ فدائی اُرش ءِ کمکار دزگیر کرتگ ءُ آئی ءِ سر ءَ بھتام جتگ –

ھمے وڑ ءَ بلوچستان ءِ باپاری شھر ھب ءَ بیگواہ بیتگیں ورنا اسلم بلوچ ھم یل بیتگ ءُ وتی لوگ ءَ سر بیتگ – اسلم بلوچ ھمے سال ءَ نومبر ءِ ماہ ءَ سیکورٹی ادارھاں دزگیر کرتگ ءُ بیگواہ کرتگ اَت-

اے ھم زانگ بہ بیت بلوچستان ءَ بیگواھیانی درچ یک دراجیں وھدے ءَ برجاہ اَنت ءُ انسانی ھکانی باسک ءُ سیاسی گلانی باسک ءُ نودربرانی بیگواھی ءَ پاکستان ءِ چیریں ادارھانی سر ءَ جنگ ءَ اَنت –