انگلش پریمیر لیگ فٹبال میڑ ءِ تہءَ گوستگیں روچ ءَ دہ ٹیم دیم پہ دیم بیتگ اَنت، اِشانی تہ ءَ آرسنل، لیورپول ءُ ایسٹن وِلا ءَ وتی گوازی بُرتگ اَنت۔
وھدیکہ نور وچ سٹی، وولفز، برائیٹن ءُ لیڈز یونائیٹڈ ءِ لئیب برابری ءَ ھلاس بیتگ اَنت۔
لیورپول ءُ ساؤتھ ایمپٹن ءِ گوازی ءِ تہ ءَ لیورپول ءَ چار گول آورتگ ءُ لئیب وتی نام ءَ کُتگ، لیورپول ءِ نیمگ ءَ ڈی. جوٹا ءَ 2 وھدیکہ ٹی، الکانٹرہ ءُ وی. وین ڈیجک ءَ یک یک گول ءِ آورتگ۔
ھمے پیم ءَ آرسنل ءَ جوانیں لئیب پیش داشتگ ءُ نیوکاسٹل ءِ دیما دو گول داتگ ءُ باج بُرتگ۔ آرسنل ءِ نیمگ ءَ بی. ساکا ءُ جی. مارٹینیلی ءَ یک یک گول ءِ آورتگ۔
مرچیگیں سیمی گوازی ءَ کرسٹل پیلس ءِ دیما ایسٹن ولا ءَ دو گول آورتگ ءُ باج بُرتگ، وھدیکہ کرسٹل پیلس ءَ یک گول ءِ داتگ۔ ایسٹن ولا ءِ نیمگ ءَ ایم. ٹارگٹ ءُ جے. مکگین ءَ یک یک گول ءِ آورتگ وھدیکہ کرسٹل پیلس ءِ نیمگ ءَ ایم . گویھی ءَ یک گول ءِ آورتگ۔