نیشنل ڈیموکریٹک پاٹی ءِ بنجاھی جارکش ءَ وتی شنگ کرتگیں درشان ءِ تہ ءَ گوشتگ کہ بلوچستان ءِ تہ ءَ انسانی ھکانی لگتمالی برجاہ انت ھمک روچ بلوچ نودربراں ھوار ھر تک ءُ پھناتاں سیادی داروکیں مردمانی آوار جنی ءِ درچ یکشل ءَ برجاہ انت کہ اے وھدی سنگینیں انسانی ھلاسی ءِ دروشم ءَ اتکگ –
جارکش ءَ گوشتگ کہ ھمے وڑ ءَ گوستگیں ھژدہ روچ انت کہ بلوچ نودربر وتی سنگتانی یل کنائینگ ءِ ھاتر ءَ بلوچستان ءِ مستریں شاھدربرجاہ بند کتگ ءُ ننداک جتگ ءُ زھرشانی کنان ءَ بلوچستان ءِ درسیں زانشجاہ بند کنگ بوتگ انت بلے اشی چہ ابید اے نودربر یل کنگ بوگ ءَ نہ انت –
جارکش ءَ گوشتگ کہ این ڈی پی میان استمانی رھبند انسانی ھکانی رِد ءَ اقوام متحدہ ءَ منّگ بوتگیں نوزدہ سد ءُ چل ءُ ھشت ءِ چارٹر یونیورسل ڈیکلیریشن فار ہیومن رائٹس ءِ انسانی آجوئی ءِ سر ءَ اوست داریت – ءُ بلوچ سرڈگار ءِ سر ءَ ھر وڑیں زلم ءُ زوراکی ءُ ناھکیانی دیم ءَ آرگ ءَ وتی کرد ءَ پیلو کنت –
جارکش ءَ گڈسر ءَ وتی درشان ءِ تہ ءَ گوشتگ دہ دسمبر ءَ انسانی ھکانی میان استمانی روچ درگت ءَ نیشنل ڈیموکریٹک پاٹی، بلوچ یکجھتی کمیٹی ءُ وائس فار بلوچ مسنگ پرسنز ءِ ھواری ءَ کراچی ءِ تہ ءَ مراگش ءِ اڈ دیگ انت کہ آئی ءِ مول بلوچ سرڈگار ءِ سر ءَ بؤکیں زلم ءُ زوراکی ءُ انسانی ھکانی بگیری دارگ پدر کنگ انت –