دی بلوچستان پوٹ اھوال پتر ءَ سر بیتگیں ھالانی رد ءَ زورانسری بیگواھی ءِ آماچیں نودربر شفیع اللہ سَے ماہ ءِ بیگواھی ءَ پد یل بیتگ ءُ وتی لوگ ءَ سربیتگ، وھدیکہ چہ گچگ ءَ دزگیری ءَ پد بیگواہ بیتگیں گزین ءُ صنم بلوچ ءُ کماشیں درے خان ھم یل کنگ بیتگ اَنت۔
شفیع اللہ ھمے سال ءَ اگست ءِ ماہ ءَ کانک ءِ نزیک ءَ چہ آئی سنگتانی ھمراہ پاکستانی پوج ءِ دست دزگیری ءَ پد ناشناسیں ھند ءَ برگ بوتگ اَت۔
شفیع اللہ ءِ یل بیگ ءِ ھال ءِ سدکی بیگواھیں بلوچانی یل کنائینگ ءِ ھاتر ءَ جھد کنوکیں گل وائس فار بلوچ مسنگ پرسنز ءَ کُتگ ءُ لوٹ کُتگ کہ ڈیھی لشکریانی دست ءَ بندیگ ءِ دگہ مردم ھم دیم ءَ آرگ بہ بنت۔
وھدیکہ یک ماہ ساری چہ گچگ ءَ زورانسری بیگواھی ءِ آماچ بیتگیں دو کسانسالیں برات ءُ گوھار صنم ء جمیل ءُ گزین ء جمیل ءُ درے خان مروچی یل کنگ بیتگ اَنت۔
زانگ بہ بیت کہ دوئیں زھگ ءُ کماشیں مرد گوستگیں ماہ ءَ بزاں اکتوبر ءَ دزگیر کنگ ءَ پد لشکریاں وتی ھمراھی ءَ بُرتگ اِت اَنت کہ چہ اِشی ءَ پد آیانی درگت ءَ ھچ اھوال نہ رس اتگ اَت وھدیکہ دومی نیمگ ءَ لشکریاں ھندی مردم لوٹارینتگ ءُ چہ ھند ءَ لڈگ ءِ پرمان داتگ اَت-
چہ گچگ ءَ بیگواھیں کسانسالیں صنم ء جمیل ءُ گزین ء جمیل ءُ درے خان ءِ زورانسری بیگواھی ءِ درگت ءَ وتی شنگ کُتگیں درشان ءِ تہ ءَ بلوچ نیشنل موومنٹ ءِ جارکش ءِ گُوشتگ اَت کہ سرجمیں بلوچستان ءِ پیم ءَ گچگ ءَ چہ دزگیر کنگ ءَ پد بیگواہ بیتگیں زھگانی کھول ءُ سرجمیں میتگ گوستگیں یک مزنیں مدتی ءَ چہ پاکستانی پوج ءِ زوراکیانی آماچ اَنت۔ اے زھگانی پیروک میر درے خان ء کریم مھمد کریم پاکستانی پوج ءَ سَے ماہ پیسر دزگیر کنگ ءَ پد بیگواہ کُتگ ھمے کھول ءِ زھگ ءُ جنین آدم پیسر ھم پوج ءَ بازیں ھپتگاں داں وتی بندی جاھاں لٹ ءُ کُت کُتگ اَنت۔