شال ءَ بیگواھیں ودود ساتکزئی ءُ نصیب اللہ بادینی ءِ کھول ءِ زھرشانی

بلوچستان ءِ بنجاھی شھر شال ءَ پریس کلب ءِ دیم ءَ چہ نوشکی ءَ زورانسری آوار جنگ بوتگیں نصیب اللہ بادینی ءُ مچ ءِ جھمنند ودود ساتکزئی ءِ کھولاں آھانی زورانسری آوار جنی ءِ بگیری ءَ مروچی زھرشانی کتگ –

زھرشانی ءَ نودربر ، سیاسی ءُ چاگردی گلانی باسک ءُ بیگواھیں مردمانی کھولاں بھر زرتگ –

زھرشانی ءَ پیسر پریس کلب ءِ دیم ءَ پریس کانفرنس کنان ءَ نوشکی ءِ جھمنند نصیب اللہ بادینی ءِ کھول ءِ گوشگ ات کہ ھمک روچ بلوچستان ءِ جتا جتائیں ھند ءُ دمگاں چہ زورانسری آوار جنگ بوتگیں مردمانی کھول وتی درد ءُ رنجاں بڈا بند اَنت ءُ امیت ءِ گوم ءَ کائنت اد ءَ پریس کلب ءَ وتی دردانی درشانی ءَ کن انت ما ھم ھمے کھولاں چہ یکے ئِے –

اھوالکاراں گوں تران کنان ءَ نصیب اللہ بادینی ءِ کھول ءِ گوشگ ات کہ نوشکی ءِ دمگ قاضی آباد ءِ جھمنند ورنائیں نودربر نصیب اللہ بادینی سال دوھزار ءُ چاردہ ءِ بیست ءُ پنچ رمس ء پاکستان ءِ چیریں ادارھانی کارمنداں نوشکی ءِ دمگ قاضی آباد ءَ آئی برات ءِ چمانی دیم ءَ دکان ءَ چہ آوار جتگ ءُ بیگواہ کتگ آئی ءِ زورانسری آوار جنی ءَ مروچی ھپت سال سرجم بوتگ –

کھول ءِ گوشگ ات کہ نصیب اللہ وانندھیں نودربر ءُ فرمانبرداریں ورنایے بوتگ اشی ءَ ابید ملک ءِ تہ ءَ آ ٹیکوانڈ ءِ گولڈ میڈلسٹ ئے، بلے ھپت سال ءِ گوزگ ءَ پد ھم آئی ءِ وش ءُ سلامتی ءِ ھچ ھال اھوال نیست –

آھانی گوشگ ات کہ ما جست کنگ لوٹ ایں یک پوزیشن ہولڈر نودربر ءُ گولڈ میڈلسٹیں ورنایے پرچا چوں گیرکانودی ءُ بے رھبندی آوار جنگ ءُ بیگواہ کنگ بیت ءُ ھما کار کہ آئی ءَ نہ کُتگ ھما کارے سزا دیگ بیت اِنت – وھدیکہ ملک ءِ تہ ءَ وتی کانود ءُ رھبند آمیدگس ھست انت گڑا پرچا یک ورنایے ماورائے کانود اے وڑ بیگواہ کنگ بوتگ کہ آئی ءِ زورانسری آوار جنی ءِ ھمراھی ءَ آئی ءِ گِس درد ءُ ازابی زند گوازینگ ءَ لاچار انت –

آھانی گوشگ ات کہ ما ھک ءُ انساپ ءِ سر ءَ اوست داریں ھمے ھاتر ءَ چہ وتی نیمگ ءَ پیسلہ کنگ ءُ گڈی رایہ ءِ دہگ ءَ ابید ھمے گوشیں اگاں نصیب اللہ بادینی ءِ ھر وڑیں بھتامے ھست یا ھر وڑیں جُرمے آئی ءَ کُتگ گڑا ملک ءِ تہ ءَ کانود ھست آمیدگساں آرگ بہ بیت آئی ءَ بگیری ءَ ارزی نبشتہ کنگ بہ بیت کیس کنگ بہ بیت آئی ءِ سر ءَ ھروڑیں بھتامے لگ ایت سزا دیگ بہ بیت مار ءَ ھچ وڑیں گپ نیست بلے اے وڑ یک مردمے ءَ ماورائے عدالت آوار جنگ ءُ آئی ءِ بیگواہ کنگ انسانی ھکانی بگیری دارگ انت –

نصیب اللہ بادینی ءِ کھول ءِ گوشگ ات کہ ما اقوام متھدہ، ایمنسٹی انٹرنیشنل، ہیومن رائٹس واچ کمیشن آف پاکستان، ایشین ہیومن رائٹس کمیشن ءَ ھوار درسیں ادارھاں چہ لوٹ کنیں کہ آ نصیب اللہ بادینی ءِ زورانسری آوار جنی ءَ گامگیج بہ زور انت ءُ آئی ءِ یل کنائینگ ءَ وتی کرد ءَ پیلو بہ کن انت –

مچ ءِ جھمنند گل زادی ھم زھرشانی ءَ ھوار بوتگ ءُ وتی برات ودود ءِ یل کنائینگے ھاتر ءَ زھرشانی کنگ انت –

گل زادی بلوچ ءَ پریس کانفرنس کنان ءَ گوشتگ کہ بلوچستان ءَ زورانسری آوارجنی نوکیں گپے نہ انت اد ءَ ھر سیمی گِس اے گیر کانودی امل ءَ اسرمند انت ھر وڑیں مردم ءَ زورانسری آوار جنگ ءُ بیگواہ کنگ میان استمانی انسانی ھکانی رِد ءَ یک جُرمے ءُ من ھم ھمے گیر کانودی امل ءَ چہ اسرمند بوتگ ءُ شمئے دیم ءَ اتکگ انت –

آئی ءِ گوشگ ات کہ منی بیست ءُ دو سالی ئیں برات ودود ساتکزئی ھمے سال ءِ دوازدہ اگست ءَ فرنٹیر کور ءُ چیریں ادارھانی کارمنداں آوار جتگ ءُ بیگواہ کتگ کہ پد ءَ رند ءَ آئی ءِ ھچ ھال نیست انت –

گل زادی ءِ گوشگ ات کہ آئی ءِ برات ودود ساتکزئی آئی ءِ سنگت نثار ء اسمائیل شاہ گِس ءَ چہ لوٹینتگ ءُ گوں وت برتگ – ھمود ءَ ساڑی ئیں چم وت دیستگیں گواھانی رِد ءَ گِس ءَ کمے دور ایف سی ءِ دو گاڑی اوشتوک بوتگ وھدیکہ آھانی ھمراھی ءَ سیاہ شیشگیں گاڑی ءِ ھم گون بوتگ – نثار ءَ گپ گپ ءَ منی برات بُرتگ ءُ ھماھانی گور ءَ سر کُتگ وھدیکہ آ ھماھانی نزیک ءَ شتگ ءُ سر بوتگ انت گڑا لس مردمی پوشاک گوریں کارمنداں منی برات ءِ دیم ءَ پُچ ءِ داتگ ءُ گاڑی تہ ءَ دور داتگ ءُ گوں وت برتگ –

گل زادی ءِ گوشگ ات کہ شما سرپد ات کہ اے وھدی بلوچستان ءِ تہ ءَ تُرس ءِ ودی بوتگ – دمگی چم دیستیں گواہ تُرسگ انت – منی برات یک نودربرے ءُ چُٹی ءِ وھد ءَ وتی برات ءِ ھمراھی ءَ اشکرانی کاریز ءَ مزوری کار کتگ ءُ روبرکت ءِ وھد ءَ گِس ءَ اتکگ اے مرد ءَ دھوکہ ءُ دروگیں درشانی ءَ ودود ساتکزئی گرائینتگ –

ودود ساتکزی گوھار ءِ گوشگ ات کہ یک مردمے ءِ جند آوار جنگ ءَ ایوک ءَ ھمائی ءِ جند بیگواہ نہ بیت بلکیں آئی ءِ سرجمیں کھول ھمے درد ءُ ازاب ءِ آماچ بیت اِنت منی برات ودود ساتکزئی ءِ زورانسری آوار جنی ءَ مئے سرجمیں کھول ازابی زند گوازینگ انت ءُ ما آئی یل بوگے راہ چاریں –

گل زادی ءِ گوشگ ات کہ ما مدامی بیگواھیں مردمانی پانکجنیں گل وائس فار بلوچ مسنگ پرسنز ءِ بنجل ءَ وتی زھرشانی نبشتہ کنائینتگ وھدیکہ سرکار ءَ چہ لوٹ کتگ ودود ساتکزئی ءِ یل کنائینگ ءَ گامگیج بہ زوریت بلے انگت مار ءَ ھک دیگ نہ بوتگ – ما یک رندے پد ءَ سرکار دمگی ءُ میان استمانی انسانی ھکانی گلاں چہ لوٹ کن ایں کہ ودود ساتکزئی ءَ ھوار درسیں بیگواھیں مردمانی یل کنائینگ ءِ ھاتر ءَ وتی کرد ءَ پیلو بہ کن انت –

گل زادی ءِ گوشگ ات کہ ایندگہ بیگواھیں مردمانی کھولانی وڑ ءَ ما ھم ھمے لوٹ کن ایں کہ اگاں ھر کسی ءِ سر ءَ بھتامے ھست گڑا ملکی کانودانی رِد ءَ آمیدگس ءَ آرگ بہ بنت کانودی لوٹ سرجم کنگ بہ بنت –

وھدیکہ دومی نیمگ ءَ بلوچ سوشل میڈیا ایکٹوسٹانی نیمگ ءَ ودود ساتکزئی ءُ نصیب اللہ بادینی ءِ پہ وشی یل کنائینگ ءِ ھاتر ءَ کمپئین ءِ برجم دارگ بوتگ کہ آئی ءِ تہ ءَ بیگواھیں مردمانی یل کنگ ءَ دیم ءَ آرگ ءُ زورانسری آوارجنی ءِ بگیری ءَ ٹویٹ کنگ بوگ انت –