گوادر ءَ سرکار ءِ مردماں گوں گپ ءُ تران بے سوب، زھرشانی برجاہ

بلوچستان ءِ تیاب دپی شھر گوادر ءَ وتی لوٹ ءِ ھک ءَ ” گوادر حق دو تھریک ” ءِ نیمگ ءَ چہ شھر ءِ مچی ایں ھند وائی چوک ءَ نندانک نُھمی روچ ءَ ھم برجاہ ءَ اِنت – مروچی بلوچستان ھکومت ءِ نیمگ ءَ چہ یک مزاکراتی کمیٹی گوادر ءِ نندانک جاہ ءَ اَتکگ ءُ گپ ءُ تران اِش کتگ –

مزکراتی کمیٹی ءِ باسک صوبائی وزیر خزانہ ظھور بلیدی، احسان شاہ ءُ لالا رشید تلو ءَ نشتگ ءُ مولوی ھدایت الرحمان بلوچ ءِ لوٹ گوشداشتگ اَنت ءُ گوشتگ کہ سرجمیں لوٹ ھک اَنت ما جُھد کن ایں گپ ءُ رپ ءَ اے جیڑہ ءَ بہ گشین ایں –

ھمے درگت ءَ مولوی ھدایت الرحمان بلوچ ءَ گْوشتگ کہ اے سی پیک دیمروئی ءَ مارا بے ازت، زاہ ءُ شُد ءَ چہ ابید دگہ ھچ نداتگ، آئی ءَ گْوشتگ کہ تیاب ءَ ٹرالرنگ ءِ تہ ءَ گیشی اَتکگ ءُ کوسٹ گارڈ زوراکی ھم گیش بوتگ اَنت –

آئی ءَ گوشتگ کہ گوستگیں روچاں کوسٹ گارڈ ءِ کارندھاں یک لاچاریں رکشہ ڈائیورے گپتگ ءُ رکشہ ءَ لڈاتگیں روگن وتی کبزہ ءَ کتگ اَنت –

آئی ءَ گْوشتگ کہ اے گریب ءِ رکشہ اگاں مہ گپت ایں گُرا پاکستان پروشتگ اَت؟ آئی ءَ دیمتر ءَ گْوشتگ کہ ایف سی ھزار درسد ءَ اُلس دُژمن اَنتءُ کوسٹ گارڈ ھم ھزار درسد ءَ اُلس دُژمن اِنت – آئی ءِ گْوشگ اِنت کہ سیمسر ءَ پاکستانی پوج ءِ آفیسر زر گرگ ءَ دلگوش اِنت –

ھکومت ءِ نیمگ ءَ اَتکگیں مردماں گوشتگ کہ لھتے جیڑہ اد ءَ گِشّ اِت کن اَنت ءُ لھتے جیڑھانی گیواری ءِ ھاترءَ مولوی ھدایت الرحمان گوں جتا نندگ ءُ گپ کنگ لوٹیت –

گُڈی ھالانی رد ءَ ھکومتی کاسد ءُ نندانک ءَ نشتگیں مردمانی میان ءَ نند ءُ نیاد بے سوب بوتگ اَنت ءُ ھمے درگت ءَ مولوی ھدایت الرحمان بلوچ ءَ گوشتگ کہ داں پھازگی لشکریانی زُلم ءُ ٹرالرنگ ءِ ھلاسی نہ بوت اے زھرشانی برجاہ بیت –