بلوچستان ءَ اکتوبر ءِ ماہ ءَ نُھ سد ءُ نود ھپت دگ ءِ وئیلاں یک سد ءُ بیست ءُ شش مردم بیران بوتگ اَنت

بلوچستان ءِ پُرشت پروشیں دگانی سوب ءَ ھمک روچ وئیل بوگ ءَ انت ھمے سال ءِ اکتوبر ماہ ءَ نُھ سد ءُ نود ھپت دگ ءِ وئیل دیم ءَ اتکگ انت کہ یک سد ءُ بیست ءُ شش مردم چہ وتی زند ءَ زبھر بوتگ انت وھدیکہ اے وئیلاں چہ یک ھزار ءُ سَے سد ءُ ھشتاد ءُ نُھ مردم زدگ بوتگ انت –

بلوچستان یوتھ ءُ سول سوسائٹی ءِ نیمگ ءَ چہ شنگ بوتگیں رپورٹ ءِ رد ءَ گوستگیں ماہ ءَ بلوچستان ءِ جتاجتائیں ھند ءُ دمگاں دگ وئیلاں وئیل دیم ءَ اتکگ انت کہ شال، کلات، مستونگ، کردگاپ ءُ پشین ءَ دوسد ءُ چِل ءُ ھپت دگ وئیلاں سَے سد ءُ سِی ءُ چار مردم زدگ ءُ سِی ءُ دو مردم بیران بیتگ۔ ھزدار، بیلہ، سوراب، آواران ءَ چار سد ءُ بیست ءُ ھشت دگ وئیلاں پنچ سد ءُ ھپتاد ءُ ھپت مردم زدگ، بیست ءُ ھپت مردم بیران بیتگ اَنت –

رپورٹ ءِ رد ءَ ژوب، لورلائی، کلہ عبداللہ، مسلم باگ، زیارت، کلہ سیف اللہ ء یک سد ءُ شست ءُ سَے دگ وئیلاں دوسد ءُ شست مردم زدگ ءُ سِی ءُ دو مردم بیران بیتگ انت ءُ وھدیکہ گوادر، پسنی، جیونی، تربت، پنجگور، بسیمہ، واشک، نوشکے، ھاران، سیندک، چاگے، نوکنڈی، دالبندین ءَ سبی ءُ نُھ دگ وئیلاں شست ءُ سَے مردم زدگ ءُ چاردہ مردم بیران بیتگ-

ھمے وڑ ءَ سبی، نسیر آباد، ڈیرہ مراد جمالی، جاپر آباد، سوئی، کوھلو، مچ، اوستہ محمد ءَ یک سد ءُ بیست دگ وئیلاں یک سد ءُ پنجاہ ءُ پنچ مردم زدگ ءُ بیست ءُ یک مردم بیران بیتگ اَنت۔

رپورٹ ءِ رد ءَ کسان سالیں زھگ عبدالجبار یک سالے ءَ پیش دگ وئیلے ءَزدگ بیتگ اَت، ھمے ماہ اکتوبر ءَ بیران بیتگ –