پنجگور ءَ پاکستانی پوج ءِ کاروان ءِ سر ءَ بوتگیں اُرش ءِ زمّہ واری بی آر اے ءَ منّ اِتگ

گیشتگان میتگ ءَ پوجی کاروان ءِ سر ءَ اُرش کتگ ءُ پنچ کارمند کُشتگ اَنت – بیبگر بلوچ

بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ زامران اُرش ءِ زمّہ واری منّ اِتگ گوشتگ کہ مئے سرمچاراں گوستگیں شپ ءَ کیچ پنجگور ءِ نیام ءَ زامران ءِ دمگ گیشتگان ءَ تر ءُ گرد کنوکیں پاکستانی پوج ءِ گشتی کاروان ءِ سرا پیسر ءَ چہ سنگر گپتگ ءُ گوں نوکیں ءُ وتکاریں سلاھاں اُرش کتگ-

جارکش ءَ گوشتگ کہ زورگیریں پوج ءِ دو گاڑی اُرش ءِ زد ءَ اتکگ ءُ پوج ءِ پنچ کارمند مرتگ ءُ بازینے زدگ بوتگ – وھدیکہ دوئیں گاڈی سک باز تاوان بار بوتگ اَنت-

جارکش ءَ گوشتگ کہ مدامی وڈا زورگیریں پوج ءِ جارکشیں گل آئی ایس پی آر وتی پوجیانی کوش آں چیر دیگ ءِ بے سوبیں جھد ءَ کنان ءَ تھنا یک کارمندے ءِ کوش ءَ منّگ ءَ اِنت۔ کہ آھانی پروش ورگ ءِ نشانی اِنت-

جارکش بیبگر بلوچ ءَ گڈسر ءَ وتی درشان ءِ تہ ءَ گوشتگ کہ بلوچستان ءِ آجوئی ءَ تاں زورگیریں اِستان ءِ بگیریءَ مئے جنگ برجاہ مانیت –