ٹی بی پی اھوال
ناکو نور دل شھدربرجاہ ءِ کنٹین ءَ مزنیں مدتے ءَ چہ کار ءَ اِنت ناکو نور دل گوش ایت کہ من کنٹین ءَ ھروھد ءِ کہ پچ کن آں الم یک برے نا بلکیں ھزار برءَ جیڑاں کہ باریں اے سھب ءَ نودربرانی سلامتی ءِ چی ھال اِنت –
ناکو نور دل گوش ایت ھما درانگازی منی دل ءِ تہ ءَ ھست اِنت کہ من آئی ءَ مردماں بہ گوش آں بلے من ءَ تُرس ءَ ھنچش گور جتگ کہ من وتی دل ءُ لاپاں ھنچیں گپ جاگہ داتگ کہ آ برے برے منی اوپار ءَ سر گوز بنت ڈن ءِ درایگ ءِ جھد ءَ کن اَنت بلے پد ءَ گوشگ ئیگ ءَ منی زبان ءَ لرز اش گپت ءُ من ھچ گوشت نہ کن آں نانکہ من وتی اندر ءِ زمیر ءَ کُشت کن آں –
ناکو نور دل گوش ایت مروچی چار سال ساری منی زھگ ءَ وھدیکہ دوازدہ ھلاس کتگ گڑا من یک برے جیڑ اِتگ کہ من ھم وتی زھگ ءَ کاراں ھمے شھدربرجاہ ءَ پہ وانگ ءُ زانگ ءَ بلے من وھدیکہ اد ءِ جاور دیستگ اَنت گڑا من زھگ ءِ گور ءَ دروگ بستگ کہ منی گور ءَ اینکس گنجائش نیست ترا دیمترا بہ وانیناں –
ناکو نور دل گوش ایت کہ من اد ءَ زانتکار ءُ لائقیں زھگ دیستگ اَنت بلے ھمے زھگانی زھنانی تیزی ءَ زاناں مردماں اوپار کرت نہ کرتگ چریشی ءَ زھگانی زھن کُنٹی ءِ نیمگ ءَ اش برتگ اَنت –
ناکو نور دل گوش ایت منی دل ھما وھد ءَ ترک ایت من وھدیکہ شھدربرجاہ ءِ دیم ءَ نودربراں پہ زھرشانی ءُ دگہ لوٹانی پریات ءَ گنداں من ءَ ھمے وھد ءَ وتی زھگ سک یات کئیت اِنت –
ناکو نور دل گوش ایت سرکار وَ ڈیھانی مھلوک ءِ پت ءُ مات اَنت اد ءَ مھلوک ءِ گپ وَ وتی جاہ ءَ اد ءَ نودربر ھم ماتو ءُ پِسوی ءِ ھساب ءَ چارگ بیگ ءَ اَنت زاناں بلوچانی بدبھتی اِنت کہ اے ماتو ءُ پِسو نودربرانی بھت ءَ کپتگ اَنت –
ناکو نور دل ءَ مئے گون ءَ ھمے شرت ءَ گپ کرتگ کہ آئی ءَ وتی نام ءُ سجوئیں چیزانی چیر دیگ ءِ لوٹ کرتگ چرے ھاتر ءَ ما اد ءَ ناکو نور دل ءِ راستیں نام چیر داتگ –
اکتوبر 2021 ءَ نودربرانی بیگواھیانی تہ ءَ اناگتیں گیشی ءِ دیم ءَ اتکگ اکتوبر ءِ ماہ ءَ بندات بیتگیں بیگواھیانی درچ انگت برجاہ اِنت
اکتوبر ءِ اولی ھپتگ ءَ بلوچستان ءِ تیاب دپی شھر چہ پسنی ءَ بلوچی زبان ءِ ورنائیں شائر اظھر نور دزگیر کنگ ءَ پد بیگواہ کنگ بیتگ اَت ۔
ھمے وڑ ءَ تیاب دپی شھر گوادر ءِ ھنکین پکیر کالونی ءَ پاکستانی پوج ءُ چیریں ادارھانی کارندھاں یک لوگے ءِ سر ءَ بیڑ برتگ اَت ءُ یک ورنایے آوار جتگ ءُ بیگواہ کتگ اَت۔
آوار جنگ بوتگیں ورنا ءِ پجّار سالم ء ابدالواحد جھمنند دشت ٹُنگی ءِ نام ءَ چہ زانگ بوتگ اَت۔
ھمے وڑ ھشت اکتوبر ءَ شنگ بیتگیں ھالی ءِ رد ءَ چہ ڈیرہ مراد جمالی ءَ سالار زورانسری آوار جنگ ءَ پد بیگواہ کتگ اَت۔
اے رد ءَ دمگی مردماں گوں ٹی بی پی ءَ گپ کنان ءَ گوشتگ اَت سالار پاکستانی پوج ءُ اسپیت پوشیں کارمنداں چہ ڈیرہ مراد جمالی ءِ بازار ءَ دزگیر کرتگ ءُ گاڑی ءَ نادینتگ ءُ وتی ھمراھی ءَ برتگ چریشی ءَ پد آئی ءِ بارو ءَ ھچ ھال ءُ اھوال نیست اِنت۔
ھمے وڑ ءَ نھ اکتوبر ءَ بلوچ اسٹوڈنٹس ایکشن کمیٹی ءِ چیرپرسن ڈاکٹر صبیحہ ءِ برات ءُ ناکوزتک ءِ بیگواھیانی ھلاپ ءَ زھرشانی ءِ جار جنگ بیتگ اَت، زانگ بہ بیت ڈاکٹر صبیحہ ءِ برات شاہ میر بلوچ نوزدہ جون دوھزار ءُ بیست ءُ یک ءَ انجینئرنگ یونیورسٹی ھزدار ءَ چار ھمراھانی ھمراھی ءَ بیگواہ کنگ بیتگ اَت پد ءَ آئی ءِ ھمراہ یلو کنگ بیتگ اَنت بلے شاہ میر انگت ءَ بیگواہ اِنت۔
ھمے رنگ ءَ ڈاکٹر صبیحہ ءِ ناکوزتک بیست ءُ پنچ جون دوھزار ءُ بیست ءُ یک ءَ دزگیر کنگ ءَ پد بیگواہ کنگ بیتگ اَت۔ زورانسری بیگواھی ءِ آماچ بیتگیں ھردوکیں ورناہ تنی وھدی بیگواہ اَنت۔
اکتوبر ءِ ماہ ءِ بیگواھیانی درچ ودان بیتگ اَت ءُ پانزدہ اکتوبر ءَ دگہ ورنایے ماجد بلوچ پوج ءَ زورانسری بیگواھی ءِ آماچ کُتگ اَت ۔
اے رد ءَ دمگی مردماں دی بلوچستان پتر ھال ءَ گوں گپ کنان ءَ گُشتگ اَت کہ ماجد گوں دگہ یک ھمراھی ءَ مھمدی کوہ ءَ ساڑی بوتگ کہ پاکستانی پوج ءِ بمب گواریں بالگرداں تیرگواری کتگ ءُ زمینی پوج ھم ھمے وھد ءَ اَتکگ ءُ سر بوتگ اَنت۔
پاکستانی پوج ءَ ماجد دزگیر کتگ ءُ گوں وت برتگ ءُ آ دومی ھمراہ تتکگ بلے تنیگت ءَ زانگ بوگ ءَ نہ اِنت کہ ماجد گوں ٹپی ئیں جاوراں پوج ءَ گپتگ یا سلامتی ءَ۔
بلوچستان ءَ کوھلو ءِ دمگ کاھان ءَ پاکستانی پوج ءَ بیست ءُ یک اکتوبر ءَ پنچ مردم آوار جنگ ءَ پد بیگواہ کُتگ اَت کہ اِشانی تہ ءَ بخش علی ءِ سے چُک بابو ، بیڑا ءُ وڈو ھوار اَنت وھدیکہ دگہ دو مردمانی پجّار داں انگت نہ بوتگ۔
بیست ءُ شش اکتوبر سال دوھزار ءُ بیست ءُ یک ءَ سی ٹی ڈی ءَ ھاران ءِ بازار ءَ بس ءِ ھڈہ ءَ دگہ یک بزگیں بلوچے زورانسری آوار جنی ءَ پد بیگواہ کتگ اَت، کہ آئی ءِ پجار علی جان ء نور مھمد جھمنند ھاران ءِ نام ءَ زانگ بیتگ اَت کہ یک سبزی بھا کنوکیں مزدورے۔
نومبر دوھزار ءُ بیست ءُ یک ءَ ھم بیگواھیانی یکشلی برجاہ بیتگ چار نومبر ءَ بلوچستان ءِ دمگ پنجگور ءَ پاکستانی لشکریاں یک ورنایے دزگیر کنگ ءَ پد بیگواہ کُتگ اَت۔ دزگیری ءَ پد بیگواہ بیتگیں ورنا ءِ پجار عاصم ء ملنگ ءِ نام ءَ بیتگ اَت۔
یک نومبر ءِ بلوچستان شاھدربرجاہ ءَ دو نودربر پھازگی لشکر ءَ زورانسری آوار جنگ ءَ پد بیگواہ کتگ اَنت کہ آھانی پجار سھیل ءُ فصیح ءِ ناماں بوتگ انت کہ انگت بیگواہ اَنت۔ سھیل ءُ فصیح ءِ بیگواھی ءِ بگیری ءَ نودربراں زھرشانی کُتگ وتی زانشتی سرگرمی ماٹو کتگ انت زھرشانی نندانک ءَ نشتگ انت۔
ھمے وڑ ءَ پنچ نومبر ءَ بلوچستان ءِ باپاری شھر ھب ءَ پاکستانی چیریں ادارھاں سَے بلوچ نودربر آوار جتگ ءُ گوں وت برتگ اَنت۔
اے دوئیں نودربر ھما وھد ءَ آوار جتگ ءُ بیگواہ کنگ بوتگ اَنت کہ آ ڈاکخانہ دگ ءَ یک دکانے ءَ نندوک بوتگ اَنت۔ آوار جنگ بوتگیں دوئیں نودربرانی پجّار زبیر زھری ء سراج احمد ءُ عدنان مینگل ء خدا بخش ءِ ناماں چہ بوتگ اَنت کہ شال پولیٹکنک کالج ءِ نودربر اَنت۔
ھمے پیم ءَ پاکستانی پوج ءَ جاؤ ءِ جھمنند چہ ھب چوکی ءَ دزگیر کرتگ ءُ برتگ، آوار جنگ بیتگیں مردم ءِ پجار میا داد ء رسول بکش ءِ نام ءَ زانگ بیتگ، کہ دمگی مردمانی رد ءَ آ پوست ءِ نادراھی ءِ آماچ بیتگ کہ جاندراھی ءِ واستا ھب چوکی ءَ اَتکگ بیتگ ۔
پنچ نومبر ءِ روچ ءَ پاکستانی پوج ءَ بلوچستان ءِ دمگ نوشکی ءَ گِسے ءِ سر ءَ بیڑ برتگ ءُ گوستگیں راجداریں رھشون سرور بلوچ ءِ دو زھگ بھروز ءُ نوبھار آوار جتگ اَنت ءُ گوں وت برتگ انت۔
ھمے وڑ ءَ شش نومبر ءَ پاکستانی پوج ءَ پنجگور ءَ چہ یک مردمے آوار جتگ ءُ بیگواہ کتگ، بیگواھیں مردم پجار راشد حسین ء واحد بخش ءِ نام ءَ چہ بوتگ۔
بلوچستان ءِ باپاری شھر ھب ءِ الہ آباد ٹاؤن ءَ چہ ھپت نومبر دوھزار بیست ءُ یک ءَ پوج ءَ دگہ یک نودربر ءِ اسلم زھری ھم دزگیر کنگ ءَ بیگواہ کُتگ اَت۔
ھپت نومبر ءَ بلوچستان ءِ دمگ کولواہ ءَ پوج ءَ بیک روزی نامیں دمگی مردمے پوجی بنجل ءَ لوٹارینتگ ءُ بیگواہ کتگ اشی ءَ پیش آئی ءِ چُک ھم زورانسری آوار جتگ ءُ بیگواہ کتگ ۔
ھمے وڑ ءَ نھ نومبر دوھزار بیست ءُ یک ءَ پوج ءَ دگہ یک نودربر ءِ آوار جنی ءَ پد زورانسری بیگواھی ءِ آماچ کُتگ کہ آئی پجار بلال زھری جھمنند زھری ھزدار ءَ چہ بوتگ ۔
بلوچ نودربرانی بگیری ءَ ھستیں ریاستی کریک ڈاؤن ءَ پوج ءَ دو دگہ نودربر عبدالرحمن ءُ جمیل احمد آوار جتگ ءُ بیگواہ کتگ انت ۔
نومبر ءِ ماھاں دیم ءَ اتکگیں اھوالانی رد ءَ کراچی ءَ بلوچ جھمنندیں دمگاں پوج ءَ پانزدہ ورناہ زورانسری آوار جتگ ءُ بیگواہ کتگ کہ آھانی تہ ءَ سَے مردم ءِ پجار نوال، عدنان ءُ صادق ءِ ناماں چہ بوتگ اَنت۔
ھمے وڑ ءَ آواران ءِ دمگ مشکے ءَ پوج ءَ دہ نومبر دوھزار ءُ بیست ءُ یک ءَ دو برات آوار جتگ ءُ بیگواہ کتگ انت ۔ دمگی اھوالکار ءِ رِد ءَ دہ نومبر ءِ شپ ءَ پوج ءُ دمگی کشندہ ٹولی ءِ کارمنداں مشکے دمگ پروار ءَ لوگانی سر ءَ بیڑ برتگ ءُ دو برات زورانسری آوار جتگ ءُ بیگواہ کتگ انت ۔ آوار جنگ بوتگیں ھردو براتانی پجار محمد عیسیٰ ءُ عبدالحق ءِ ناماں چہ بوتگ انت۔
یازدہ نومبر ءَ ھم بلوچستان ءَ زورانسری بیگواھی برجاہ بیتگ وھدے ڈیرہ بگٹی ءَ پوج ءَ سھب ءِ سر ءَ لوگانی سر ءَ بیڑ برتگ ءُ ورنایے آوار جتگ ءُ بیگواہ کُتگ، آوار جنگ بوتگیں مردمے پجار عبدالوھاب بگٹی ءِ نام ءَ چہ بوتگ ۔
بلوچستان ءَ بیگواھی جنرل پرویز مشرف ءِ سرکار ءَ ھما وھد ءَ بندات بیتگ کہ بلوچ راجی جُنز پہ وتی آجوئی ءَ ترندی ءَ گوں جُنزگ ءَ بیتگ۔ ھما وھد ءَ بلوچانی توار ءَ ھلاس کنگ ءِ ھاتر ءَ مردمانی بیگواہ کنگ، لٹ ءُ کُٹ کنگ ءُ کُشگ ءِ پالیسی کارمرز کنگ بیتگ۔ بلے وھد ءَ پیش داشتگ کہ ریاستی پالیسیاں بلوچ جھد ھلاس کُت نہ کُتگ بلکیں نودربرانی گیشتر ھمراہ داری گندگ بیتگ۔
اے درگت ءَ ما بلوچ نودربر رھشون ڈاکٹر ماھرنگ ءَ جُست کُتگ کہ آ بلوچ نودربرانی چُشیں ترندی ءَ گوں بیگواھی ءُ پد ءَ واکدارانی ترندیں زبان ءَ گپ دروگیں قول کنگ ءُ بلوچستان ءِ سر وزیر ءِ نوکتریں درشان ءَ چون چارگ ءَ اِنت کہ آ گُش ایت ما چارگ ءَ اِنت کہ آیا بیگواھیں مردم در ملک ءَ وَ نہ شُتگ اَنت؟
بلوچ نودربر رھشون ڈاکٹر مھرنگ ءِ رد ءَ: بیگواھیں مردمانی درگت ءَ سرکار ءَ ناکہ گوست ءَ ناکہ انی اے رنگیں کرد پیلو کرتگ ءُ ناکہ چوشیں گامگیج آیاں زرتگ اَنت چرے سبب ءَ بیگواھیں مردمانی درگت ءَ چیزے نا چیزے اھوال در اَتک بہ کنت۔
آئی ءَ گوشت کہ انی ھم سرکار ءِ الکاپیں گامگیج نیست کہ اے کساس ءَ مزنیں جیڑھے کہ انٹرنیشنل گل کہ ھست اَنت اے گپ ءَ گوشگ ءَ اَنت کہ پاکستان ءَ نہ تھنا بلوچ بلکیں پشتون ءُ سندھیانی سر ءَ ھم بیوکیں زوراکیانی درگت ءَ جست کنگ ءَ اَنت کہ اے وڑیں وئیلانی اھوال مارا سر بیگ ءَ اَنت ءُ اے درگت ءَ ایمنسٹی ءِ یک رپورٹے ھم شنگ بیتگ اَت اشی ءَ ابید پاکستان ءِ سپریم کورٹ ءَ اے درگت ءَ رپورٹ پیش کنگ بیتگ اَنت، گڑا اے اگاں راستی نہ اَنت؟ گڑا چی اَنت؟
ڈاکٹر مھرنگ بلوچ ءَ گُشت کہ اے وڑ باز بر ءَ بیتگ کہ سرکاری واکداراں بازیں براں راستی ھور ءُ تور ءُ لپاشگ بیتگ اَنت ءُ پندل ءُ ھنراں چوشیں گپ گار کنگ بیتگ اَنت – کہ چریشی ءَ ھما گاریں مردمانی درگت ءَ آیانی کھولاں باز جیڑھانی دیمپانی بیتگ –
ڈاکٹر مھرنگ ءَ گُشت کہ ھروھد ءَ بلوچستان ءَ نوکیں سرکار کہ جوڑ بیت آ وتی ھما نوکیں پالیسی یا ما اشی ءَ کھنیں پالیسی گشت کنیں کہ ما زاریں بلوچاں گپ ءُ وشدلی ءِ نیمگ ءَ کار ایں گڑا اشی ءَ زانگ بیت اِنت کہ سرکار ھما وتی بے سوبیانی سبب ءَ چوشیں گپانی درنگازی ءَ کنت –
آئی ءَ گُشت کہ اے بیگواھی ءِ درچ کہ دوھزار ءَ بندات بیتگ یا چریشی ءَ پیسر بندات بیتگ اشی ءِ تہ ءُ دوھزار ءَ بیگواھیانی تہ ءَ گیشی اتکگ ءُ مروچی کہ دوھزار ءُ بیست ءُ یک اِنت ءُ انی ھم ھما ترندی یکشل ءَ برجاہ اَنت –
ڈاکٹر مھرنگ بلوچ ءَ گشت کہ اد ءَ نودربر وانگ ءُ زانشت ءِ دربرگ ءَ کائینت گڑا اد ءَ وتی اگبالانی ھاترءَ راجکاری ھم کن اَنت چریشی ءَ سرکار نودربرانی ترسینگ ءَ آیاں سیاست ءَ چہ دور کنگ ءَ اِنت گڑا ھمے رنگ ءَ آیاں گرگ ءُ گار کنگ ءَ اِنت ءُ چرے درچ ءَ بلوچستان ءَ بے کساس ورنائیں زانشت کار گار ءُ بیگواہ کنگ بیتگ اَنت –
ھمے پیم ءَ بلوچ نودربر سیاست ءَ ھواریں ورنائیں جھد کار ءُ بی ایس او ءِ بنجاھی انفارمیشن سیکریٹری بالاچ قادر ءَ جُست کُتگ کہ بلوچستان مزن شھدربرجاہ ءِ دیم ءَ برجائیں زھرشانی ءَ ابید ھم ورناہ بیگواہ بیگ ءَ اَنت ءُ شھدربرجاہ ءِ واکدارانی گوں نودربراں گپ ءُ تران ءَ پد ءَ ترندیں درشان نودربرانی لوٹانی سرجم نہ کنگ ءَ چوں چارئے ءُ اگاں نودربر یل کنگ مہ بنت گُڑا وانندہ گلانی دیمتریں گام چی بیت کن اَنت ؟
بلوچ وانندہ گل ءِ بنجاھی رھشون بالاچ قادر ءَ گوشت سَے نومبر ءَ بہ گر داں انگیگ ءَ دومی ھپتگ سرجم بیگ ءَ اِنت کہ نودربر زھرشانی کنگ ءَ اَنت بنداتی ءَ نودربراں زھرشانی ءَ انتزامیہ ءَ ھال داتگ ءُ کھول ءَ بیگواھیں نودربرانی ارزی نبشتگ کنائینتگ اَت ءُ ڈپارٹمنٹ ءِ پاکستان اسٹڈڈیز ءِ باسکاں ھم ڈپاٹمنٹ ءَ چہ بائیکاٹ کرتگ اَت ءُ ڈپاٹمنٹ ءِ تہ ءَ ھم زھرشانی کتگ اَت۔
بالاچ قادر ءَ گوشت کہ اے جیڑہ الکاپی ءَ زورگ نہ بیتگ ءُ چریشی ءِ سر ءَ نودربر لاچار بیتگ اَت ءُ نودربراں شھدربرجاہ بند کرتگ۔
بی ایس او بنجاھی انفارمیشن سیکریٹری بالاچ قادر ءَ سرکاری واکدارانی کرد ءِ درگت ءَ گپ کنان گُشت کہ سرکاری واکداراں مارا چہ موکل لوٹ اِتگ ءُ گوشتگ کہ بیگواھیں نودربرانی بارو ءَ پَٹ ءُ پول کن ایں بلے گوستگیں روچ ءَ سرکاری واکدار اَتکگ ءُ آیاں بیگواھیں نودربرانی بارو ءَ ھچ چوشیں گپ دست ءَ نہ داتگ ءُ انگت ءَ وھد لوٹ اِتگ۔
بالاچ قادر ءَ شھدربرجاہ ءِ انتزامیہ ءِ کرد ءِ درگت ءَ گپ کنان ءَ گوشت کہ اولی زمہ واری یونیورسٹی ءِ انتزامیہ ءُ وائس چانسلر ءِ بیت اِنت آ نودربرانی پھزداری ءَ بہ کنت بلے آئی ءِ پھزداری وتی جاہ ءَ آ اے بیتگیں وئیل ءَ پھک ءَ بے توار اِنت ءُ مئے ھچ کمک ءَ کنگ ءَ نہ اِنت۔
آئی گُشگ اَت کہ باید یونیورسٹی انتزامیہ ءَ ھما اولی روچ ءَ بیگواھیں نودربرانی واستا یک کمیٹی ءِ جوڑ بہ کرتیں دانکہ اے درگت ءَ جوانیں پَٹ ءُ پول کنگ بیت اِنت بلے چوشیں ھچ گامگیج زورگ نہ بیتگ ءُ انگت ءَ بیگ ءَ نہ اِنت۔
آئی ءَ گوشت کہ نودربرانی کمیٹی ءَ ھمے سوڑگ کرتگ ءُ گوشتگ کہ داں ھما وھد ءَ یونیورسٹی بند ءُ کلاسانی ماٹو کنگ برجاہ بیت اِنت دانکہ مئے ھمراھیں نودربر یل کنگ نہ بنت –
بالاچ قادر ءَ وانندہ گلانی دیم ءِ گامگیجانی درگت ءَ گپ جنان ءَ گوشت کہ دگہ جاھانی نودربر گلاں گوں مئے رھوت ھست اِنت آیانی نیمگ ءَ ھمے گوشگ بیتگ کہ ھرچ جار ءِ شما جن اِت ما آئی ءَ ھما وڑ ءَ گامگیج زوریں۔ بالاچ قادر ءَ گُڈ سر ءَ گوشت کہ اگاں اے نودربر یل نہ بیت اَنت گڑا گمان ھمیش اِنت کہ آؤکیں گامگیجانی تہ ءَ بلوچستان ءَ ھوار ملکی دگہ شھر ءُ شھدربرجاھانی تہءَ زھرشانی گیش ءُ ترند کنگ بنت۔