شال ءَ بیگواھیں مردمانی ھاتر ءَ زھرشانی برجاہ

بلوچستان ءِ بنجاھی شھر شال ءِ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ ءَ، زھرشانی ءَ مروچی چار ھزار چار سد ءُ نود ءُ نُھ روچ سرجم بوتگ – مچ ءَ چہ سیاسی ءُ چاگردی باسک عزیز بلوچ، جاوید بلوچ، درمحمد بلوچ ءُ دگہ تک ءُ پھناتاں سیادی داروکیں مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ ھمے ماھے اکتوبر ءِ بنداتی روچاں پاکستانی پوج ءَ بلوچ سرڈگار سرڈگار ءِ پرزندانی ھوناں گوں شُشتگ ءُ ماھے بندات کتگ – مچ بولان ءِ دمگ پاکستانی پوج ءَ وتی انگیر ءَ کُتگ اَنت پوجی لشکر کشی بندات کتگ – ھمے وڈ مستونگ ءَ سی ٹی ڈی ءِ دستاں نُھ بیگواھیں مردم دروگیں میڑ ءِ نام ءَ شھید کتگ –

آئی گوشگ ات کہ زورگیرانی مدامی ھمے رویش بوتگ کہ وتی ناجائزیں زورگیری ءِ برجاہ دارگ ءُ بلوچ راج ءِ مال ءُ مڈیانی لُٹ پُل ءَ برجاہ دارگے ھاتر ءَ ھچ وڈیں گیر اخلاقی کارانی کنگ ءَ چک ءُ پد نہ بیت اِنت –

ماما قدیر بلوچ ءِ گوشگ ات کہ بلوچستان ءَ زلم زوراکیانی تہ ءَ گیشی آرگ بوتگ بلوچستان ءَ برجاھیں انسانی ھکانی لگتمالی میاں استمانی ایواناں چست بوتگیں توار ءَ پاکستان ءِ رھبندانی چاردیواری ءِ تہ ءَ کیز کنگ ءَ پکر کن انت – اکتوبر ءِ ماہ ءَ جالاوان ءِ بنجاھی دمگ ھزدار ھم کوش جاہ ءِ جوڈ بوتگ – پاکستانی ریاست ءِ چیردستی ءَ ردوکیں کتکاریں کارمنداں پُرایمنیں جھد کنوکیں باسک یک یک ءَ جتگ انت لس مھلوک ھم کُشندہ ٹولیانی کارمندان وتی نشانگ جوڈ کتگ انت – بلے ادے جاھمنندیں پُسگاں اے زلم زوراکیاں ابید وتی جھد برجاہ داشتگ ءُ بیگواھیں مردمانی یل کنگے ھاتر ءَ وتی ھونریچی ءَ چہ پد نہ کنزتگ انت –

ماما قدیر بلوچ ءِ گوشگ ات کہ اے راجدپتری راستی ءِ کہ اے درسیں چیلنج آنی دیم دارگ پد ما دژمن ءِ سر ءَ غالب بوت کنیں مھکمیں گل ءُ نظم ضبط ، پھتوی ءُ پگری زانت ءُ زانشت ءُ ترندیں احتساب ءَ ابید پُرایمنیں جُھد بیگواھیں مردمانی یل کنائینگ ممکن نہ انت – مروچی اے چیز المی انت کہ بلوچ جھد ءَ ھواریں درسیں راجکاریں گل ءُ پاٹی اے رھبندانی سر ءَ امل بہ کن انت پرچاکہ اے رھبندانی سر ءَ امل کنگ ءَ چہ ما بیگواھیں مردمانی یل کنائینگ ءَ سوبمند بوت کنیں –