شال نودربرانی بیگواھی: سرکارانی واکدارانی گپ ءُ تران بے سوب شھدربرجاہ ءِ گیٹ دو بر بند

بلوچستان ءِ بنجاھی شھر شال ءَ ھمے ماہ ءِ یک نومبر ءَ بلوچستان شھدربرجاہ ءَ بیگواہ کنگ بیتگیں سھیل بلوچ ءُ فصیح بلوچ ءِ بیگواھی ءِ ھلاپ ءَ برجاھیں نندانک ءَ نودربرانی گون ءَ گپ ءُ تران ءَ سرکاری واکدار بے سوب بیتگ اَنت ءُ نودربراں دوبر شھدربرجاہ ءِ گیٹ بند کرتگ ءُ گیٹ ءِ دپ ءَ زھرشانی نندانک ءِ برجاہ کنگ ءِ جار جتگ –

گوستگیں ھشت روچاں نودربراں شھدربرجاہ ءِ ایڈمین گیٹ ءِ دیم ءَ نندانک جتگ ءُ سرکاری واکداراں لھتے روچانی مھلت لوٹ اِتگ بلے مروچی سَے شَمبے ءِ روچ ءَ سرکاری واکدارانی گڈی گپ ءُ تران ءِ روچ بیتگ ءُ مروچی آ گپ ءُ تران ءَ اتکگ اَنت ءُ چریشی ءِ پژدر ءَ گپ ءُ تران بے سوب بیتگ ءُ نودربراں دوبر زھرشانی بندات کرتگ –

زھرشانی ءَ گپ ءُ تران ءَ عبدالرحمان کیتھران، ایس ایس پی آپریشن، اے سی شال، میر اختر لانگو، سیکورٹی انچارج یونیورسٹی ءُ اقبال زرکون اتکگ بیتگ اَنت –

نودربرانی گوشگ اِنت مئے زھرشانی داں ھما وھد ءَ برجاہ بیت اِنت کہ اے بیگواھیں دوئیں نودربر دیم ءَ آرگ نہ بنت –

نودربراں وتی وانگی پرکاری بند کرتگ ءُ شھدربرجاہ ھم بند کرتگ ءُ گیٹ ءِ دپ ءَ نندانک ءَ نشتگ اَنت –

زانگ بہ بیت یک نومبر ءَ بلوچستان شھدربرجاہ ءَ دو نودربر سھیل بلوچ ءُ فصیح بلوچ گرگ ءُ بیگواہ کنگ بیتگ اَنت ءُ نودربرانی گوشگ اِنت کہ اے مردم بیگواہ کنگ بیتگ اَنت ھمے ساھت ءَ کیمرہ ءُ دگہ انتزمیہ پرکاری مئے ھمراھداری کنگ ءَ نہ اَنت چریشی ءَ اشی ءَ زانگ بیتگ کہ اے نودربرانی بیگواھی ءَ انتزامیہ ءَ ھوار شھدربرجاہ ءِ دگہ واک ھم ھوار اَنت –

زانگ بہ بیت بلوچستان ءَ ھمے ماہ ءَ بازیں کچے ءَ نودربر گرگ ءُ بیگواہ کنگ بیتگ اَنت ءُ نودربرانی بیگواھیانی ھلاپ ءَ کراچی ءَ ھوار بلوچستان ءِ دگہ جاھاں ھم زھرشانی کنگ بیتگ اَنت –