بلوچستان ءَ دو جتائیں دگ ءِ وئیلاں زھگاں ھوار بازین ءِ ٹپی

سربوتگیں ھالانی رِد ءَ بلوچستان ءِ دمگ مستونگ ءَ اسکول وین گاڑی ءِ وئیل آماچ بوتگ ءُ بازیں زھگے ٹپی بوتگ ، وھدیکہ بیلہ ءَ مساپر کشیں بس ءُ گاڑی ءَ ڈیک ورگ ءَ پنچ مردم ٹپی بوتگ –

گیشیں ھالانی رِد ءَ مستونگ ءِ دمگ کڈکوچہ ءَ ماشاءاللہ ہوٹل ءِ نزیک ءَ زھگانی اسکول وین ءَ گوں کسانیں گاڑی ءَ ڈیک وارتگ چریشی ءَ اسکول وین ءَ سواریں بازیں زھگ ءِ ٹپی بوتگ –

وئیل ءِ آماچ بوتگیں زھگ ھما دمان ءَ نواب غوث بخش میموریل نادراھجاہ ءَ برگ بوتگ انت ٹپ درمان کنگ بوتگ ءُ اود ءَ ھپت ٹپی بوتگیں زھگ شال ٹراما سنٹر ءَ دیم دئیگ بوتگ –

ھمے وڈ لسبیلہ آر سی ڈی دگ ءِ سر ءَ بس ءَ گون گاڑی ءَ ڈیک وارتگ ڈیک ورگے سوب ءَ پنچ مردم ٹپی بوتگ انت –

وئیل ءَ ٹپی بوتگیں مردمانی پجار شفقت اللہ ء محمد امین، اسد اللہ ء عبدالمجید، عبدالرحمن ء محمد حسن، امین اللہ ء شاکر، مقبول احمد ء میر محمد ءِ ناماں چہ بوتگ –

وئیل ءِ آماچ بوتگیں مردم ھما دمان ءَ نادراھجاہ ءَ سر کنگ بوتگ انت ٹپانی درمان کنگ ءَ پد پہ گیشیں الاج ءِ ھاتر ءَ کراچی ءَ دیم دئیگ بوتگ انت –