بلوچستان ءِ تہ ءَ دہ روچاں سی ءُ ھشت مردم آوار جنگ بوتگ – ایچ آر سی بی

ہیومن رائٹس کونسل آف بلوچستان ءَ وتی شنگ کرتگیں رپورٹ ھمے ماہ ءِ دہ روچانی میان ءَ بلوچستان ءِ تہ ءَ سِی ءُ ھشت مردم زورانسری آوار جنگ بوتگ کہ گیشتریں کچ بلوچانی انت –

ایچ آر سی بی رپورٹ ءِ رِد ءَ ھمے ماہ ءَ مزنیں کچ ءَ زورانسری آوار جنی ھال سر بوتگ انت –

گل ءِ رِد ءَ ھمے ماہ ءِ نومبر ءِ رمس پنچ ءَ گل ءَ اے ھال سربوتگ کہ بلوچستان شاھدربرجاہ ءَ دو نودربر سیکیورٹی پوج ءَ زورانسری آوار ءُ بیگواہ کتگ آھانی پجار سھیل ءُ فصیح ءِ ناماں چہ بوتگ انت –

آئی ءَ گوشتگ کہ وانگجاھاں نودربرانی زورانسری آوار جنی ءَ پد ایندگہ نودربراں زھرشانی کُتگ وتی زانشتی سرگرمی ماٹو کتگ انت نندانک جتگ ءُ نشتگ انت –

رپورٹ ءِ رِد ءَ ایندگے روچ ءَ پاکستانی پوج ءَ بلوچستان ءِ باپاری شھر ھب ءِ دمگ ڈاکخانہ ءَ چہ کوئٹہ پولیٹیکنک کالج ءِ دو نودربر زبیر زھری ء سراج احمد ءُ عدنان مینگل ء حدابخش زورانسری آوار جتگ ءُ بیگواہ کتگ انت –

رپورٹ ءِ رِد ءَ ھما روچ ءَ پاکستانی پوج ءَ بلوچستان ءِ دمگ نوشکی ءَ گِس ءِ سر ءَ بیڑ برتگ ءُ گوستگیں راجداریں رھشون سرور بلوچ ءِ دو زھگ بھروز ءُ نوبھار آوار جتگ ءُ گوں وت برتگ انت –

بلوچ نودربرانی بگیری ءَ ھستیں ریاستی کریک ڈاؤن ءَ پوج ءَ دو دگہ نودربر عبدالرحمن ءُ جمیل احمد آوار جتگ ءُ بیگواہ کتگ انت –

ایچ آر سی پی رپورٹ ءِ رِد ءَ پوج ءَ یک دگہ نودربر ءِ اسلم ھم ھب ءِ دمگ الہ آباد ٹاؤن ءَ آوار جتگ ءُ بیگواہ کتگ –

رپورٹ ءِ تہ ءَ گوشگ بوتگ کہ ھپت نومبر ءَ بلوچستان ءِ دمگ کولواہ ءَ پوج ءَ بیک روزی نامی دمگی مردمے پوجی بنجل ءَ لوٹارینتگ ءُ بیگواہ کتگ اشی ءَ پیش آئی ءِ چُک ھم زورانسری آوار جتگ ءُ بیگواہ کتگ –

رپورٹ ءِ تہ ءَ دیمتر ءَ گوشگ بوتگ کہ کراچی ءَ بلوچ جاھمنندیں دمگاں پوج ءَ پانزدہ ورناہ زورانسری آوار جتگ ءُ بیگواہ کتگ کہ آھانی تہ ءَ سَے مردم ءِ پجار نوال، عدنان ءُ صادق ءِ ناماں چہ بوتگ انت –