ٹی ٹوئنٹی ورلڈ کپ: آسٹریلیا ءَ پاکستان پروش داتگ ایونٹس ءَ درکتگ

دبی ءَ آئی سی سی مینز ٹی ٹوئینٹی ورلڈ کپ گوازی ءِ دومی سیمی پائینل ءَ آسٹریلیا ءَ پاکستان پروش داتگ ءُ وت ءَ پائینل ءَ سر کتگ –

آسٹریلیا ءَ یکسد ءُ ھپتاد ءُ ھپت رنانی ٹارگٹ نوزدھمی اوور ءَ پنچ وکٹانی تاوان ءَ پروشتگ –

پاکستان ءَ بیست اوورانی تہ ءَ چار وکٹانی تاوان ءَ یکسد ءُ ھپتاد ءُ شش رن جوڈ کتگ درساں گیش محمد رضوان ءَ شست ءُ ھپت ءُ فخر زمان ءَ پنجاہ ءُ پنچ رن جوڈ کتگ –

پاکستان ءِ نیمگ ءَ داتگیں یکسد ءپ ھپتاد ءُ ھپت ءِ ٹارگٹ ءِ پروشگے ءِ ھاتر ءَ آسٹریلیا ءِ لیبیاں پٹ ءَ ایر کپتگ – بندات ءَ آسٹریلیا ءِ لیبیاں انچو ھاس لیب پیش نہ داشت اولی اوور ءَ کپٹن ایرون فنچ زیرو ءِ سر ءَ شاھین شاھ ءِ بال ءَ ایل بی ڈبلیو بیت ءُ واتر بیت –

اولی وکٹ کپگ ءَ پد مچل مارش ءُ ڈیوڈ وارنر پنجاہ ءُ یک رن ھوری ءَ جوڈ کرت وھدیکہ آسٹریلیا ءِ اسکور پنجاہ ءُ دو ءَ سر بوتگ ات گڈا مچل بیست ءُ دومی بال ءَ شاداب ءَ کینچ کت –

آسٹریلیا ءِ سیمی وکٹ ھپتاد ءُ ھپتمی رن ءَ کپت اسٹیون ءَ پنچ رن جوڈ کت ءُ شاداب ءِ دست ءَ آؤٹ بیت –

پاکستان چارمی سوبمندی ھشتاد ءُ نُھ رنانی سر ءَ رست کہ ڈیوڈ وارنر ءَ چِل ءُ نُھ رن جوڈ کت آؤٹ بوت –

آسٹریلیا پنچمی تاوان نود ءُ شش رنانی سر ءَ چست کت وھدیکہ گلین میکسویل ءَ ھپت رن جوڈ کرت آؤٹ بوت – بلے آسٹریلیا ءِ لیبیاں جوانی ءَ گوازی برجاہ داشت ءُ پنچ وکٹانی تاوان ءَ پاکستان ءِ داتگیں ٹارگٹ پروشت ءُ گوازی وتی نام ءَ کُت –

ٹی ٹوئینٹی ورلڈ کپ ءِ فائینل گوازی یکشمبے روچ ءَ چاردہ نومبر دبی انٹر نیشنل کرکٹ پٹ ءَ برجاہ دارگ بیت انت –