بلوچ یکجھتی کمیٹی ءِ جارکش ءَ رسانکدراں وتی شنگ کرتگیں درشان ءِ تہ ءَ نودربرانی زورانسری آوارجنی ایرجتگ ءُ گوشتگ کہ بلوچستان ءَ تُرس ءِ ودّینگ ءِ ھاتر ءَ یکرندے پد ءَ زورانسری آوارجنیانی تہ ءَ گیشی آرگ بوگ ءَ انت – اے زوراکیانی بگیری ءَ چست بوتگیں توار ءُ نودربرانی تہ ءَ ودی بوتگیں زانت ءِ ھلاس کنگ ءِ ھاتر ءَ نودربر زورانسری آوارجنگ بوگ ءَ انت –
آئی ءَ گوشتگ کہ بلوچستان ءَ مات ءُ پت وتی چکاں شاھدربرجاھاں زانت ءِ دربرگ ءِ ھاتر ءَ دیم دے اَنت تاکہ آ زانت ءَ در بہ بر انت ءُ وتی کھول ءُ راج ءِ کمک ءَ کرت بہ کن انت بلے بلوچستان ءِ تہ ءَ نوں وانگجاہ ھچ وڑ ءَ نودربرانی ھاتر ءَ مھپوز نہ انت – شاھدربر جاہ ءِ ھاسٹل ءَ چہ بلوچ نودربرانی زورانسری آوار جنی ءَ پد ھر گِس ءِ تہ ءَ پریشانی انت، اگاں نودربر وتی وانگجاھانی تہ ءَ پھریز نہ انت گڑا کجا بہ رو اَنت؟ –
آئی ءِ گوشگ ات کہ بلوچستان ءِ تہ ءَ چیزیں روچ انت نودربرانی زورانسری آوار جنی ءِ تہ ءَ گیشی آرگ بوتگ- ھب چوکی، مکران ءُ نوشکی ءَ بازیں نودربر ءِ گیر کانودی ءُ بے رھبندی زندانی تہ ءَ بندیگ کنگ بوگ ءَ انت – اولسر ءَ نودربر وتی گسانی تہ ءَ بے پھریزی ءِ آماچ بوتگ انت بلے نوں شاھدربرجاھانی تہ ءَ ھم پھریز نہ انت – ھزدار ءَ چہ بساک ءِ سرکماش ڈاکٹر صبیحہ بلوچ ءِ برات ءَ ھاسٹل ءَ چہ زورانسری آوار جنگ ءُ بیگواہ کنگ پد ءَ آھاں بیھار دیگ کہ آ راجکاری ءَ چہ دسکش بہ بنت ءُ نوں سھیل ءُ فصیح اللہ ءِ ھاسٹل ءَ چہ زورانسری آوار جنی نودربراں ماژگی زوراکی اماچ کنگ ءُ آھانی کھول ھاتر ءَ ترس ءِ ودّینگ ءِ کوشست بوگ ءَ انت – اے وڑیں بے رھبندی ءُ گیر کانودی امل ھچ وڑ ےَ اوپار کنگ نہ بیت اگاں نودربر یل کنگ نہ بوت اَنت گڑا آئی ءِ بگیری ءَ سرجمیں بلوچستان ءَ زرمبشت ءِ بندات کنگ بیت اِنت –
جارکش ءَ گوشتگ ورناہ ھر راج ءِ سرین ءِ ھڈ ءِ بستار ءَ دار انت – وھدیکہ یک مزلومیں راج ءِ ورناہ آ راج ءِ گڈی کوپگ دؤک بنت – بلوچ راج وتی باندات ءِ چراگاں تھاریں زندانانی تہ ءَ گار بوگ ءَ نیلیت – بلوچستان ءِ تہ ءَ شاھدربر جاہ نیستی ھساب انت اگاں ھمے دؤئیں شاھدربر جاھاں ورنا گستہ کنگ بہ بنت گڑا بلوچستان ءَ زانشتی بحران پیداک بیت انت –
جارکش ءَ گوشتگ کہ سرکار ءُ اے ادارہاں چہ ورنایانی یل کنگ ءِ لوٹ کنیں اگاں آ یل کمگ نبوتاں گڑا اشی ءِ بگیری ءَ گیشی ءَ زرمبشت چست بیت انت –