مشکے، پنجگور ءُ ڈیرہ بگٹی ءَ دو براتاں ھوار پنچ مردم بیگواہ

سربوتگیں ھالانی رِد ءَ بلوچستان ءِ دمگ ڈیرہ بگٹی، پنجگور ءُ آواران ءَ پاکستانی پوج ءَ دو براتاں ھوار پنچ مردم زورانسری آوار جتگ ءُ بیگواہ کتگ انت –

ڈیرہ بگٹی ءَ چہ آوار جنگ بوتگیں مردمے پجار عبدالوہاب بگٹی ءِ نام ءَ چہ بوتگ – اھوالکار ءِ رِد ءَ آوار جنگ بوتگیں ورناہ پوج ءَ مروچی سھب ءِ سر ءَ آئی گِس ءَ بیڑ برتگ ءُ آوار جتگ ءُ بیگواہ کتگ کہ انگت بیگواہ انت –

دومی نیمگ ءَ آواران ءِ دمگ مشکے ءَ ھم پوج ءَ دو برات آوار جتگ ءُ بیگواہ کتگ انت –

دمگی اھوالکار ءِ رِد ءَ دوشی شپ ءَ پوج ءُ دمگی کشندہ ٹولی ءِ کارمنداں مشکے دمگ پروار ءَ اشانی گِس ءِ سر ءَ بیڑ برتگ ءُ ھردو برات زورانسری آوار جتگ ءُ بیگواہ کتگ انت –

آوار جنگ بوتگیں ھردو براتانی پجار محمد عیسیٰ ءُ عبدالحق ءِ ناماں چہ بوتگ انت –

ھمے وڑ پاکستانی پوج ءَ پنجگور ءَ چہ ھم دو مردم آوار جتگ ءُ بیگواہ کتگ –

بیگواھیں مردمانی پجار راشد حسین ء واحد بخش ءُ سجاد ء لال بخش ءِ ناماں چہ بوتگ انت –

اھوالکار ءِ رِد ءَ راشد شش نومبر ءَ ءُ سجاد دو ستمبر ءَ پوج ءَ آوار جتگ ءُ گوں وت برتگ انت کہ انگت بیگواہ انت –

زانگ بہ بیت لھتے روچانی تہ ءَ پوج ءَ مزنیں کچے ءَ مردم آوار جتگ کہ آھانی تہ ءَ گیشتریں کچ بلوچ ورناہ ءُ نودربرانی انت –

وھدیکہ ھمے ماہ ءَ بلوچستان شاھدربرجاہ ءِ ھاسٹل ءَ چہ پوج ءِ دست ءَ آوار جنگ بوتگیں نودربرانی یل کنائینگ ءِ ھاتر ءَ نودربرانی شال ءَ زھرشانی برجاہ انت وھدیکہ شال ءِ بازیں وانگجاھاں نودربراں وتی زانشتی سرگرمی بائیکاٹ کتگ انت –