شال نودربرانی بیگواھی: سیمی روچ ءَ نودربرانی یل کنگ ءِ ھاتر ءُ زھرشانی نندانک برجاہ، شھدربرجاہ بند

بلوچستان ءِ بنجاھی شھر شال ءَ یک نومبر ءَ بلوچستان شھدربرجاہ ءِ ھاسٹل ءَ بیگواہ بیتگیں سھیل بلوچ ءُ فصیح بلوچ ءِ بیگواھی ءِ ھلاپ ءَ مروچی سیمی روچ ءَ شال ءَ نودربرانی نیمگ ءَ زھرشانی نندانک برجاہ اِنت –

زھرشانی ءَ نودربراں بلوچستان ءِ بنجاھی شھر شال ءِ دراجیں کالج، یونیورسٹی بند کرتگ ءُ اے وھد ءَ زھرشانی کنگ ءَ اَنت، اشی ءِ ھواری ءَ نودربراں کلاسانی پیپر ھم ماٹو کرتگ اَنت –

نودربرانی گوشگ اِنت کہ داں آوار جنگ بیتگیں سھیل بلوچ ءُ فصیح بلوچ یل نہ کنت داں ھما وھد ءَ اے زھرشانی برجاہ بیت اِنت اگاں یل نہ بیت اَنت گڑا دیمتر ءَ زھرشانی گیش کنگ بیت اِنت-

گوستگیں شپ ءَ نودربراں پریس کانفرنس کنان ءَ گوشتگ کہ یک نومبر ءَ سھیل بلوچ ءُ فصیح بلوچ گرگ ءُ گار کنگ بیتگ اَنت ءُ تنی وھدی آیانی ھچ ھال نیست اِنت ءُ جامعہ بلوچستان ءَ نودربرانی گرگ ءُ گار کنگ ءِ مول ءُ مراد نودربرانی وانگ ءِ دیم ءَ ڈنگر جنگ اِنت کہ اے نودربرانی آوار جنگ ءُ گار کنگ ھمے بیگواھیانی درچ اِنت –

ھمے وڑ ءَ بانداتگیں روچ ءَ وائس فار بلوچ مسنگ پرسنز ءَ کراچی ءِ پریس کلب ءِ دیم ءَ بلوچستان ءَ نودربرانی بیگواھیانی ھلاپ ءَ زھرشانی ءِ جار پرینتگ ءُ گوشتگ کہ یازدہ نومبر ءَ زھرشانی کنگ بیت اِنت ءُ دراھیں انسانی ھکانی باسک ءُ انسان دوستاں گوں دزبندی اِنت کہ اے زھرشانی ءَ بھر بہ زور اَنت –

زانگ بہ بیت بلوچستان ءَ ھمے ماہ ءَ بازیں ھسابے ءَ نودربر گرگ ءُ گار کنگ بیتگ اَنت –