نوشت ءِ ارزشت-سعید احمد بلوچ

نبشتانک: نوشت ءِ ارزشت

نبشتہ کار: سعید احمد بلوچ

دی بلوچستان پوسٹ

بلوچ اسٹوڈنٹس ایکشن کمیٹی (بساک) ءِ بنکی مول ءُ مراد ھمیش اِنت کہ بلوچستان ءُ بلوچستان ءَ ڈن ورنائیں بلوچ وانندھاں یکجاگہ بکنت ءُ آھاں راج دوستی ءُ راجی پکر ءُ زانت بہ دنت- اگاں بلوچ وانندہ یکجا بہ بنت بساک ءِ ھواری ءَ ایندگہ دراھیں کار شوکیں ءُ شریں وڑے ءَ سرجم بنت-

همے درگت ءَ بلوچ ورنایانی راجی پگر ءُ زانت ءِ دیگ ءِ ھاترا بساک وتی سےَ ماھی تاک (نوشت) ءِ چاپ ءُ شنگ کنگ ءِ سوڑگ زُرت ءُ نوشت ءِ اولی چاپ ماں 2020 ءَ شنگ ءُ تالان بوت ءُ اے وھدی نوشت ءِ دو چاپ ءِ سوبمندی ءَ چَہ پَد سیمی تاک ھم پہ جوانی چاپ شنگ ءُ تالان بوتگ-

اگاں ما نوشت ءِ ارزشت ءِ سر ءَ ھبر بہ کن اِیں گُڑا مارا درستاں چَہ پیسر نوشت ءِ ارزشت اے گندگ ءَ کیت کہ نوشت مئے وتی شھدیں زبان بلوچی ءُ براھوئی ءَ اَنت اگاں ما گوں ھورتی ءَ بی ایس او ءِ پنجاہ ءُ چار سال گوست ءَ بچاریں تَہ مارا چوشیں هچ تاک دست نہ کپ ایت کہ آ سرجم ءَ بلوچی ءُ براھوئی زبان ءَ بہ بنت ءُ اے دابیں کار دست نہ کپ ایت کہ مروچی آ کاراں بساک کنگ ءَ اِنت-

ماتی زبان ءِ ارزشت ءِ سر ءَ جاگھے ڈاکٹر ولسن ءِ گوش اِیت کہ “اگاں تو وتی ماتی زبان ءَ گپ کنگ ءَ لج بہ کن ئے گُڑا بِہ پَھم کہ تو زِھنی گلامے ءُ دیمروئی تئی تالہ ءَ نہ اِنت” اے ھبر ءِ تہ ءَ ھچ وڑیں شَک نیست کہ کسّ ئِے کہ دگر ءِ زبان ءِ باھوٹی بیگواھی ءِ مانزمان اِنت جھان ءِ تہ ءَ هچ چُشیں راج دست نہ کپ ایت کہ آھاں دری زبان ونتگ ءُ دیمروئی کُتگ ما پرچا دگر ءِ زبانانی پُشت ءَ کپتگ اِیں ءُ وتی شھدیں زبان بلوچی ءُ براھوئی یلہ داتگ اَنت-

اے تچکیں گپّے کہ وتی ماتی زبان ءَ تو ھمک چیز ءَ گوں شرّی ءَ ونت ءُ پھم اِت کن ئے وتی زبان ءِ ھمک گال ءُ گالرد یک یک ءَ مجگ ءَ نند اَنت اے درگت ءَ بساک ءِ جھد لکھ ستا کرزیت کہ آئی ءَ دراھیں چیز ءُ جاور گوں ھورتی ءَ تپاس اِتگ اِنت ءُ وتی نکاناں ماں “نوشت” ءَ بلوچ ءُ براھوئی زبان ءَ شنگ کنگ ءَ اِنت ایشی ءِ سیت باز اَنت یکیں ایش اِنت کہ ھمک نبشتانک جوانی ءَ گوں پھمگ بنت ءُ مجگ ءَ نند اَنت ءُ دومی ایش اِنت کہ بلوچی ءُ براھوئی وانگ ءِ کچ ءُ واھگ گیش بوان بیت ءُ زبان ءِ جند ھم دیمروئی کنت-

ھما زانت، ھما نبشتانک کہ تئی وتی ماتی زبان ءَ بہ بیت آئی ءَ تو زوت دربُرت کن ئے یک یک دانکے تئی مجگ ءَ جاگہ کنان کنت “نوشت” ءِ سیمی تاک ءِ گوں سوبمندی ءَ شنگ ءُ تالان بوگ ءُ آئی ءِ تہ ءِ جوانیں ندکارانی بے دروریں نبشتانکاں چہ اے پدّر بیت کہ نوشت ءَ وانوک ءُ بلوچ نودربرانی دل ءِ تہ ءَ جاگہ کتگ نوشت ءَ وانگ ءُ نبشتہ کنگ ءِ نوکیں واھگے بندات کتگ کہ شالا سوبین بات، نوشت ءِ تہ ءَ پد ءَ دراھیں نبشتانک گچینی نبشتانک اَنت کہ گچینی سرھالانی سر ءَ نبشتہ کتگ اَنت کہ بلوچ نودربراں سیاسی سنچ ءِ ھواری ءَ وتی زمین، دودمان ءُ زبان ءِ درگت ءَ گرانبھائیں سرپدی دئے اَنت امیت اِنت کہ بلوچ اسٹوڈنٹس ایکشن کمیٹی وتی سَے ماھی تاک “نوشت” ءَ ھمے وڑ برجاہ داریت ءُ بلوچ چاگرد ءَ وانگ ءُ نبشتہ کنگ ءِ سکین دیان کنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔