پاکستانی پوج ءِ نیمگ ءَ دمگاں زوانسری لڈ ءُ بار کنگ ءُ زورانسری آوار جنیانی بگیری ءَ کراچی ءَ زھرشانی

بلوچ یکجھتی کمیٹی کراچی ءِ نیمگ ءَ بیگواھیں مردمانی کھول ، نودربر ءُ سندھی باسکانی ھمراھی ءَ کراچی پریس کلب ءِ دیم ءَ زھرشانی بُنجلے جوڑ کنگ بیتگ –

بلوچستان ءَ پاکستانی پوج ءِ نیمگ ءَ چہ زُلم ءُ زوراکی برجاہ ءَ اَنت –

کراچی پریس کلب ءِ دیم ءَ جوڑ کتگیں زھرشانی بُنجل ءَ چہ رسانکدر ءَ گپ ءُ تران کنان ءَ بلوچ یکجھتی کمیٹی ءِ آرگنائزر آمنہ بلوچ ءَ گوشتگ کہ بلوچستان ءِ دمگ چہ آواران ءَ بے انسانی ءُ بے راہ ءُ راھبندی وڑ ءَ دمگ ءَ لڈ ءُ بار کنائینگ ءَ اَنت ، آواران ءِ دمگ پیراندر ءَ چہ زورانسری مردماں درکنگ ءَ اَنت ، انّوگ ءَ واشک ءِ دمگ ٹوبہ ءَ چہ کماش درّا خان ءِ کسانیں سالی ئیں نماسگ پاکستانی پوج ءَ زورانسری آوار جنی ءِ نشانگ کتگ ءُ مردماں دمگ ءِ ھالیگ کنگ ءِ پرمان داتگ-

آمنہ بلوچ ءِ رِد ءَ آواران ءِ نندوکاں پھازوکی ءِ نام سر ءَ وتی لوگاں درایگ ءِ گوشگ بوگ ءَ اَنت وھدے کہ درّا خان ءُ آئی ءِ نماسگ صنم جمیل ءُ گزین ھم تنیگت ءَ بیگواہ ءَ اَنت وھدے کہ ما اے وڑیں پھازوکی تُرس ءِ سرپد بوگ ءَ چہ ما بے وسیں چریشی ءِ آسر ءَ چُک ءُ کماشاں پاکستانی پوج چست کنت ءُ سرپدی لوٹگ ءَ اِنت –

آمنہ بلوچ ءَ گوشتگ کہ بلوچستان ءَ پاکستانی پوج ءِ ادارھانی نیمگ ءَ چہ کہ بے انسانی ءُ بے راھبندی کردگاراں کنگ ءَ اِنت آ جھان ترا ھچ جاگہ گندگ نَیت ، بلوچ ورناہ ناں وانگجاھاں مُھر اَنت نانکہ کہ لوگاں ، ھمکروچی مردماں بیگواہ کنگ ءَ اَنت، دو روچ ءَ ساری پاکستانی پوج ءَ ھب چوکی ءِ چہ زبیر زھری ءُ عدنان مینگل نامیں دو ورناہ آوار جتگ ءُ بیگواہ کتگ اَنت –

آئی ءَ گوشتگ کہ چیزے روچ ءَ پیش پاکستان ءِ سروکی ءَ جوڑ کتگیں دمگی ڈیتھ اسکواڈ ءَ سھیل نامیں ورنایے کُشتگ کہ اشی ءِ بزانت اش اِنت ریاست بلوچستان ءَ چست بؤکیں توار ایرموش کنگ ءِ جُھد ءَ اَنت-

آئی ءَ گوشتگ کہ سُھیل بلوچستان ءِ بیگواھیں مردمانی ھاتر ءَ یک توارے اَت یکرندے پوج ءَ آ ھم زورانسری آوار جنی ءِ نشانگ کنگ ءَ پد یل داتگ نو دمگی ڈیتھ اسکواڈ ءِ دست ءَ چہ سھیل بلوچ کُشتگ-

آمنہ بلوچ ءَ دیمتر ءَ گوشتگ سندھ ءَ ھم ریاست ءِ دوزواہ بے میاریں سندھیانی کُشت ءُ کوش ءَ ھوار اَنت آئی ءِ مسال ناظم چوکھیو ءِ نوکیں وئیلے-

آمنہ بلوچ ءَ کراچی ءِ ساڑی ئیں ھرچ پڑ ءَ سیادی داروکیں مردماں بُنجل ءِ بھر بوگ ءُ زُلم ءِ بگیری ءَ توار چست کنگ ءِ دزبندی کتگ-