شال ءَ زورانسری آوار جنیانی بگیری ءَ زھرشانی

بلوچستان ءِ بنجاھی شھر شال ءَ بلوچستان ءَ زورانسری آوار جنیانی بگیری ءَ زھرشانی کنگ بوتگ – زھرشانی ءَ بیگواھیں مردمانی کھول، سیاسی، چاگردی ءُ نودربر گلانی باسکاں مزنیں کچے ءَ بھر زرتگ –

زھرشانی ءِ جار بیگواھیں نودربر شفیع اللہ بلوچ ءُ بیگواھیں دوست محمد بلوچ ءِ کھول ءَ پرینتگ –

زھرشانی ءَ بیگواھیں دوست محمد بلوچ ءِ کھول ءِ گوشگ ات کہ دوست محمد نُھ سال ساری پوج ءَ چہ کراچی ءَ آوار جتگ ءُ بیگواہ کتگ کہ روچ مروچی بیگواہ انت ـ

کھول ءِ رِد ءَ دوست محمد بلوچستان ءِ دمگ پنجگور ءِ نندوک انت، نھ سالانی ودار ءَ پد دوست محمد بلوچ دیم ءَ آرگ بوگ ءَ نہ انت –

وھدیکہ ھمے سال ءِ اگست ءِ ماہ ءَ زورانسری آوارجنگ بوتگیں شفیع اللہ بلوچ ءِ کھول ھم زھرشانی ءَ ھوار بوتگ انت –

زھرشانی کنوکاں تران کنان ءَ گُوشت کہ بلوچستان ءِ تہ ءَ زورانسری آوار جنی کسہ ءَ دیر انت ءُ ھر تک ءُ پھناتاں سیادی داروکیں مردم اے گیرانسانی کار ءَ چہ نہ رکیتگ، نُھ سالاں چہ بیگواھیں دوست محمد بلوچ ءُ دگہ بازیں مردمے ھست کہ بازیں دھکاں گار ءُ بیگواہ انت ءُ دیم ءَ آرگ بوھگ ءَ نہ انت –

آھانی گوشگ ات کہ زورانسری آوار جنی ءَ نہ اوشتوکیں اے کسہ ءَ لھتے روچ ساری بلوچستان ءَ بازیں نودربرے آوار جنگ ءُ بیگواہ کنگ بوتگ –

شفیع اللہ بلوچ ءِ کھول ءِ رِد ءَ شفیع اللہ یک نودربرے ءُ وتی سنگتانی ھمراھی ءَ نوشکی ءَ چہ شال ءَ آھگ ءَ بوتگ کہ مستونگ ءِ نزیک ءَ کانک ءَ پاکستانی پوج ءَ آوار جتگ –

زھرشانی کنوکاں لوٹ کتگ کہ زورانسری آوار جنی ءِ گر ءُ دار بہ بیت ءُ بیگواھیں مردم یل کنگ بہ بنت ءُ زانشجاھاں پوج ءِ بیڑ بری دارگ بہ بیت –

زھرشانی ءَ بلوچستان ءِ دمگ مچ ءَ بیگواھیں داؤد بلوچ ءِ کھول ءَ ھوار دگہ بازیں بیگواھیں مردمانی کھول ھوار بوتگ اَنت وتی دوستیگیں مردمانی یل کنگ ءِ لوٹ اش کتگ –