شال ءَ پوج ءِ سر ءَ بمب تراک

بلوچستان ءِ بنجاھی شھر شال ءَ بمب تراکے ءَ پاکستانی ایف سی نشانگ کنگ بیتگ –

گیشیں ھالانی رد ءَ بلوچستان ءِ بنجاھی شھر شال ءَ سریاب دگ ءَ حق آباد ءَ ریلوے پھاٹک ءِ ھند ءَ تراک بیتگ، چریشی ءِ آسر ءَ پوجی کارمندانی جانی تاوانانی گمان کنگ بیتگ –

دمگی مردمانی رد ءَ فرنٹیئر کور ءِ کارمند گاڑی ءُ پرپٹانی ھمراھی ءَ تر ءُ تاب ءَ بیتگ اَنت کہ ناگتی تراک بوتگ –

تراک ءَ پد پولیس بازیں کچے ءَ سر بیتگ ءُ تراک جاہ انگیر ءَ کرتگ ءُ پُٹ ءُ پول اش بندات کتگ ئِے –

ھالانی تہ ءَ گوشگ بیتگ کہ تراک ریلوے ٹریک ءِ نزیک ءَ بیتگ ءُ پولیس ءَ ھمے جاہ سرجم ءَ انگیر ءَ کرتگ –

واکدارانی نیمگ ءَ تنی وھدی اے ھال ءِ بارو ءَ دگہ گیشیں ھال دیم ءَ نیتکگ اَنت –

ھمے وڑ بلوچستان ءِ دمگ ڈیرہ بگٹی ءَ تیرگواری وئیلے ءَ لیویز کارمندے ءَ ھوار دو مردم بیران بیتگ اَنت –

تیرگواری ءِ وئیل ڈیرہ بگٹی ءِ دمگ پھیلاوغ ءَ دیم ءَ اتکگ کہ اود ءَ دو مردم کشگ بیتگ اَنت –

زانگ بہ بیت گوستگیں شپ ءَ کیچ تربت آبسر ءَ تیرگواری وئیلے ءَ پولیس کارمندے بیران ءُ یکے زدگ بیتگ اَت –

بیران بیتگیں مردم ءِ پجار امتیاز ء لیاقت ءِ نام ءَ زانگ بیتگ اَت کہ کاؤنٹرٹیررازم ڈپارٹمنٹ (سی ٹی ڈی) ءِ کارمندے بیتگ –

دمگی مردمانی رد ءَ ھردوک وتی اسٹور ءَ نندوک بیتگ اَنت کہ سلاہ بنفیں مردماں آیانی سر ءَ تیرگواری کرتگ –