چئیرپرسن ڈاکٹر صبیحہ بلوچ ءِ برات ءُ ناکوزتک ءِ زورانسری آوارجنی ءِ بگیری ءَ اسلام آباد ءَ زھرشانی کنگ بیت – بلوچ اسٹوڈنس وفاق پنجاپ

بلوچ اسٹوڈنس وفاق پنجاپ ءَ رسانکدراں شنگ کرتگیں درشان ءِ تہ ءَ بساک ءِ سرکماش ڈاکٹر صبیحہ بلوچ ءِ برات شاھمیر ءُ ناکوزتک مرتضی بلوچ ءِ زورانسری آوار جنی ءُ بلوچستان ءَ ھواریں سزا دئیگے کردگار ایرجتگ گوشتگ کہ بلوچ سیاسی باسکانی یکجاھی سزا دئیگ یے کردکار بند کنگ بہ بیت –

آئی ءَ گوشتگ کہ بلوچستان ءِ تہ ءَ یک دھک ءَ سیاست ءِ سر ءَ زاھری اگں چیریں دروشم ءَ بندش جنگ بوتگ ھمائی ءِ رِد ءَ نودربر رھشون ءُ آھانی کھول ھواریں سزا دئیگ بوھگ ءَ انت – شاھمیر بلوچ ءُ مرتضی بلوچ ءِ آوار جنی ھمے پالیسیانی درچ انت –

آئی ءَ دیمتر ءَ گوشتگ کہ سیاست ءِ تہ ءَ وتی جوانی کرد ءِ پیلو کنگے سوب ءَ ڈاکٹر صبیحہ بلوچ ءَ ھواریں سزا دئیگ بوھگ ءَ انت ھمیشی ءِ رِد ءَ نوزدہ جون سال دوھزار بیست ءُ یک ءَ آئی ءِ برات شاھمیر بلوچ ھزدار یونیورسٹی آف انجینئرنگ اینڈ ٹکنالوجی ءُ بیست ءُ پنچ ستمبر ءَ آئی ءِ ناکوزتک مرتضی بلوچ آوار جنگ ءُ بیگواہ کنگ بوتگ انت –

بلوچستان ءَ ھواریں سزا دئیگ کردگار نوک نہ انت بلکیں یکشل ءَ ھمے درچ برجاہ انت – گوستگیں روچاں واشک ءَ آواران ءِ جاھمنند کسانیں زھگ صنم ء جمیل ءُ گزین ء جمیل آوار جنی ھم ھمے پالیسیانی بھر اِنت –

آئی ءَ وتی شنگ کرتگیں درشان ءِ تہ ءَ گوشتگ کہ اے وڑیں پالیسی بلوچستان ءِ تہ ءَ سیاست ءَ سنٹ کنگے مَٹ اَنت، اگں اشانی بگیری ءَ جنگ کنگ نہ بیت آؤکیں وھد ءَ اے مئے ھستی ءَ نہ بوھگ ءِ ھد ءَ تاں نزور کن انت – ھمے ھاتر ءَ مئے درسانی راجی زمہ واری انت اے وڑیں زوراکیانی بگیری ءَ یک مشت بہ بئیں ءُ توار چست بہ کنیں ءُ اے وڑیں پالیسیانی گر ءُ دار ءَ بہ کنیں –

گڈسر ءَ درشان ءِ تہ ءَ گوشگ بوتگ کہ بلوچ اسٹودنس وفاق ءُ پنجاپ نیمگ ءَ پنچ شمبے روچ ءَ شاھمیر ءُ مرتضی بلوچ ءِ یل کنائینگے ھاتر ءَ چاگردی ترامجاھاں کمپین ءِ چلائینگ بیت اِنت ءُ آدینگ ءَ اسلام آباد نیشنل پریس کلب ءِ دیم ءَ زھرشانی کنگ بیت اِنت – آھاں چہ درسیں سیاسی ءُ انسانی ھکانی ادارھاں چہ لوٹ کتگ کہ زھرشانی ءَ بھر بہ زور انت –