شال ءَ بیگواھیں مردمانی ھاتر ءَ زھرشانی برجاہ

بلوچستان ءِ چپ ءُ چاگرداں زورانسری آوار جنی ءِ درچ یکشل ءَ برجاہ انت – ماما قدیر بلوچ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیِ مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ چار ھزار ءُ چار سد ءُ ھشتاد ءُ سَے روچ سرجم بوتگ –

پریس کلب ءِ دیم ءَ بیگواھیں ءُ آوارجنی ءَ پد کُشگ بوتگیں مردمانی اکس ایر انت ءُ ماما قدیر بلوچ ءُ بیگواھیں مردمانی کھول ھمود ءَ نندوک انت، زھرشانی بنجل ءَ وکیل ءُ دگہ تک ءُ پہناتاں سیادی داروکیں مردماں اتکگ ءُ دلپدری درشانتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ مروچی بلوچ ورناھانی جون مار ءَ چہ یکجاھی ءِ لوٹ کنگ ءَ انت –

آئی ءِ گوشگ ات کہ بلوچ راج ءَ یکجاہ بوھگ ءُ اے زوراکیانی دیم ءَ اوشتگی انت اگاں اے راج ءَ یکجاھی ءَ بے ھسی ءِ آماچ بوت گڈا تباھی ءِ نیمگ ءَ رؤت – ریاست بلوچ ءِ سیاسی جھد ءَ بے دردی ءَ درگان درگان کنگے کوشست انت – بلوچستان ءِ ھر دمگاں زورانسری آوارجنی، لشکر کشی ءُ ماورائے عدالت کُشت کوش ءِ تم نبوھوکیں درچ یکشل ءَ برجاہ انت –

ماما قدیر بلوچ ءِ گوشگ ات کہ بلوچ راج اے زوراکیانی بگیری ءَ وتی جھد ءَ برجاہ بدار انت ءُ ایر دستانی سر ءَ اے سیاھیں شپ زوت ھلاس بوھگ انت –

گڈسر ءَ ماما قدیر بلوچ ءَ گوشتگ کہ وائس فار بلوچ مسنگ پرسنز ءِ جھد بیگواھیں مردمانی یل بوھگ ءَ تاں برجاہ مانیت –