پاکستانی پوج ءَ مزنیں کچے ءَ دشت ءَ یک میتگے انگیر ءَ کتگ ۔
سربوتگیں ھالانی رِد ءَ بلوچستان ءِ دمگ کیچ ءِ تھسیل دشت کاشاپ پاکستانی پوج ءَ گوستگیں شپ ءَ بگر تاں انو میتگ انگت انگیر ءَ اِنت میتگ ءِ روگ ءُ آیگی راہ ءُ در بند کنگ بیتگ اَنت-
دمگی مردمانی رِد ءَ پاکستانی پوج ءَ میتگ ءِ جند مردم ھرکس کہ پہ سُھب ءِ سر ءَ وتی لاپ شوھازگ ءَ چہ میتگ ءَ ڈن درایگ ءِ جُھد کتگ آ واتر کتگ اَنت ئِے نہ اِشتگ اَنت ئِے ھمے گوستگیں روچ ءَ چہ کلسر ءَ اَتکگیں مردم کاشاپ ءَ پہ وتی سیادانی گندوکی ءَ آ ھم دوشی وتی میتگ ءِ نیمگ ءَ روگ ءَ بوتگ اَنت واتر کنائینتگ اَنت ئِے-
دمگی مردمانی رد ءَ کاشاپ ءِ نادُراھجاہ پیسر ءَ چہ پاکستانی پوج ءَ وتی کبزہ ءَ کتگ بُنجل کتگ-
دمگی مردمانی رِد ءَ پاکستانی پوج ءِ کارندہ مزنیں کچے ءَ دمگ ءَ ساڑی اَنت میتگ سر کوھی دمگ ءَ ھم لشکرکشی کنگ ءَ اِنت-
زانگ بہ بیت بلوچستان ءِ جتاجتائیں دمگاں پاکستانی پوج ءِ لشکر کشی ءُ زورانسری آوار جنی برجاہ ءَ اَنت آ روچ پہ روچ وتی زوراکی ءَ گیش کنگ ءَ اِنت-
ھمے وڑ پاکستانی لشکر ءَ مند ءُ دشت ءِ میانی کوھاں پترتگ، جتا جتائیں جاھاں لشکر کشی کنگ ءَ اِنت۔
پاکستانی لشکر ءِ جتا جتائیں جاھاں گوں ترندی ءَ لشکر کشی کنگ اِنت۔ کتریز، ننکارو، بانسر، کلکور، سھریں کوہ، شالویگ، گیشتان ءُ کنٹانی ءَ لشکر کشی برجاہ انت-