بلوچستان ءَ دگ ءُ تیرگواری وئیل ءَ سے مردم بیران ءُ دو ٹپی بوتگ اَنت

بلوچستان ءِ جتائیں دمگ شال ءُ پنجگور ءَ دگ ءُ تیرگواری ءِ وئیل ءَ سے مردم بیران ءُ دو ٹپی بوتگ اَنت-

سربوتگیں ھالانی رِد ءَ پنجگور ءَ سی پیک دگ ءَ گریب نواز ھوٹل ءِ نزیک ءَ کرولا گاڑی یے چپی بوتگ ءُ دو مردم بیران بوتگ ءُ دو ٹپی بوتگ اَنت –

بیران بوتگیں مردمانی تہ ءَ اسلام ء انور جھمنند بلیدہ ءُ بھروز ء وارس جھمنند پروم ناماں چہ زانگ بوتگ اَنت وھدے کہ ٹپی بوتگیں سمیر ء لالا نزیر ءُ ندیم ء غلام جان پہ دوا ءُ درمان کنگ ءِ ھاتر ءَ نادُراھجاہ ءَ برگ بوتگ اَنت –

ھمے وڑ شال ءِ ھند ھزار گنجی ءَ ناشناسیں سلاہ بندیں مردمانی تیرگواری ءَ چہ یک مردمے بیران بوتگ-

بیر بوتگیں مردم ءِ پجّار خان محمد ء سوب خان لانگو جھمنند دشت ترامیل نام ءَ چہ بوتگ ءُ کوش ءِ سوب انگت زانگ نہ بوتگ-

زانگ بہ بیت بلوچستان ءَ دگ ءِ وئیلاں سالے تہ ءَ ھزاراں گیش مردم مر اِیت ٹپی بیت بلوچستان ءَ پرشت ءُ پروشیں دگانی سبب ءَ بازیں مھلوکی چہ زندگی ءَ زبھر کنگ بوتگ دومی نیمگ ءَ بلوچستان ءِ بُتیں وزیر ءُ گزیر بلوچستان دیمروئی ءَ مدام دروگیں ٹاہ دے اَنت-