مند ءَ پاکستانی پوج ءِ سر ءَ بوتگیں اُرشانی زمّہ واری بی ایل ایف ءَ منّ اِتگ

شیپچار ءُ سنگستان ءَ پاکستانی پوج ءِ سر ءَ اُرش کتگ ءُ جانی مالی تاوان داتگ – میجر گوھرام بلوچ

سربوتگیں ھالانی رِد ءَ گوستگیں روچاں ناشناسیں سلاہ بندیں مردماں مند ءَ دو جتائیں جاھاں پاکستانی پوج ءِ سر ءَ اُرش کُتگ –

اولی اُرش مند ءِ دمگ سنگستان ءَ بیست ءُ نُھ اکتوبر ءَ پوجی پانگس ءِ سر ءَ کنگ بوتگ وھدیکہ سِی اکتوبر ءَ مند ءِ دمگ شیپچار ءَ سیمسر ءَ ٹٹ جنوکیں پوجی کارمندانی سر ءَ کنگ بوتگ – اُرش ءَ پاکستانی پوج ءَ جانی ءُ مالی تاوان بوتگ اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ اَنت –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ ھردو اُرشانی زمّہ واری منّ اِتگ گوشتگ کہ مئے سرمچاراں بیست ءُ نھ اکتوبر ءَ مند سنگستان ءَ برجاھیں پاکستانی پوج ءِ پانگس ءِ سر ءَ دورجنگیں توپک ءِ سر ءَ اُرش کرتگ، یک کارمندے کشتگ-

آئی ءَ دیمتر ءَ گوشتگ کہ سِی اکتوبر ءِ بیگاہ ءَ مند شیپچار ءَ سیمسر ءَ ٹٹ کنوکیں پاکستانی پوج ءِ کارمندانی سر ءَ اُرش کرتگ، چریشی ءَ پاکستانی پوج ءَ جانی ءُ مالی تاوان رس اتگ –

جارکش میجر گھرام ءَ گڈ سر ءَ وتی درشان ءِ تہ ءَ گوشتگ کہ مئے اے دابیں اُرش بلوچستان ءِ آجوئی ءَ تاں برجاہ مان انت –