لیاری: بساک بنزہ ءِ نیاد ، سمیر بلوچ بنزہ ءِ سروک گچین کنگ بوتگ

کراچی ءَ بلوچ اسٹوڈنس ایکشن کمیٹی لیاری بنزہ ءِ نیاد، دیوان بنزہ ءِ سروک شما بلوچ ءِ سروکی ءَ برجم دارگ بوتگ ءُ گل ءِ نوکیں بنزہ ءِ جوڑ کنگ بوتگ –

نیاد ءِ گچینی مھمان ھنکین ءِ سنگت سلیم بلوچ سنگت پیرجان بلوچ، سنگت شیھک الھی بوتگ انت ءُ نیاد ءَ ھنکینی سرکولر، گوستگیں بنزہ ءِ اھوال، نگدکاری، گل ءِ کار ، ھندی ءُ میان استمانی جاورھال، آؤکیں کارانی بنگپ ءِ سر ءَ تران کنگ بوتگ اَنت –

نیاد ءَ تران کنانءَ آھاں گُشت کہ وھدے کہ ما سیاسی گَلے ءِ بہر بئیں گڑا الّم انت کہ مئے تہ ءَ زمہ واری ءِ مارشت بہ بیت۔ گَل ءَ گوں زمہ واری ءَ کار کنگ مارا یک جوانیں سیم سرے ءَ سر کنت۔

گَلءِ دستور ءَ گوں ھچ وڑیں ریا کنگ نہ بیت بائد اِنت کہ گَل ءِ ھر یک باسکےگَل ءِ دستور ءَ جوانیں وڑے ءَ سرپد بہ بیت ءُ وت ءَ دستور ءِ پابند بہ کنت-

نیاد ءَ جتا جتائیں بنگپانی سر ءَ باوست ءَ رند ھنکینی کُمک کارگُشاد ءَ ھستیں بنزہ ءِ ھلاس کنگ ءِ جار جَت ءُ نوکیں بنزہ کابینہ گچین کنگ بوت کہ سمیر بلوچ بنزہ ءِ کارمستر، شاہجان بلوچ کمک کارمستر، زاھد بلوچ کارگشاد، عامربلوچ کُمک کارگُشاد ءُ ھمّل بلوچ شنگار گچین کنگ بوت اَنت-

گچین کنگ بیتگیں بنزہ ءِ سروک ءُ باسکاں گل ءِ رھبندانی سر ءَ ستک داشتگ ءُ ھنکینی کُمک کارگُشاد ءَ نوک گچین بوتگیں سنگت سوگند دات انت ءُ نوکیں بنزہ ءِ کارگُشاد ءَ دیوان ءِ ھلاسی ءِ جار جت-