شال،منگچر ءُ پنجگور ءَ پنچ کس زورانسری آوار جنگ بیتگ اَنت

بلوچستان ءَ زورانسری آوار جنیانی درچ یکشل ءَ برجاہ اَنت – گوستگیں شپ ءَ بنجاھی شھر شال ءُ زیارت ءِ ھند منگچر ءَ یکیں کھول ءَ سیادی داروکیں دگہ چار کس زورانسری آوار جنگ ءُ بیگواہ کنگ بیتگ اَنت ھمے وڑ گوستگیں روچاں چہ پنجگور ءَ یک مردمے آوار جنگ ءَ پد بیگواہ کنگ بیتگ –

دمگی مردماں گوں ٹی بی پی ءَ گپ کنان ءَ گشتگ کہ شال ءِ دمگ سریاب کلی سردے ءَ دو برات دوست مھمد ءُ حمزہ ء مھمد عمر گوستگیں شپ ءَ پاکستانی پوج ءُ چیریں ادارھاں آوار جتگ ءُ بیگواہ کرتگ اَنت –

دمگی مردمانی گوشگ اِنت کہ کارندھاں لوگ انگیر کنگ ءَ پد چاردر ءُ چار دیواریاں پامال کنان ءَ لوگ ءَ جاڑیگیں مردم لٹ ءُ کٹ اِش کتگ اَنت ءُ اے دویں مردم گون وت اش برتگ اَنت – برگ بیتگینانی تہ ءَ دوست مھمد گیس کمپنی ءَ ملازم اِنت ھمے وڑ حمزہ رکشہ ھلائینگ ءِ کار ءَ کنگ ءَ بیتگ –

ھمے وڑ ءَ گپتگیں مردمانی دگہ دو سیاد ھم گوستگیں شپ ءَ منگچر ءَ پوج ءُ چیریں ادارھانی کارندھاں آوار جنگ ءَ پد ناشناسیں جاھاں برتگ اَنت کہ چریشی ءَ پد آیانی ھچ ھال نیست اِنت –

منگچر ءِ دمگ کورکی آدم زئی ءَ بیگواہ کنگ بیتگیں مردم دو برات سعد اللہ ءُ مھمد علی ء خان مھمد ھوار اَنت –

اے مردم سعد اللہ مستری، مھمد علی ٹینکر ھلائینت وتی زند ءِ روچ ءَ تیلانک دنت –

اے گپتگیں مردمانی بارو ءَ واکداراں تنی وھدی ھچ گپ پیش نہ کرتگ –

دومی نیمگ ءَ گوستگیں روچاں پنجگور ءَ احسان ء اعظم چتکان بازار ءَ دیم پہ لوگ ءَ روگ ءَ بیتگ کہ ناگتی بیگواہ بیتگ –

دمگی مردماں دی بلوچستان پوسٹ ءَ گوں گپ کنان ءَ گشتگ کہ اے گار بیتگیں ورنا دکانداری ءِ کار ءَ بیتگ کہ بیگاہ ءَ دکانے بند کتگ ءُ لوگ ءَ روگ ءَ بیتگ کہ ڈیتھ اسکواڈ ءِ کارمنداں آوات جتگ ءُ پوج ءِ دست ءَ داتگے –

زانگ بہ بیت بلوچستان ءَ زورانسری آوار جنیانی وئیل دو دھکاں گیش برجاہ اَنت وھد وھد ءِ سر ءَ لھتے مردم یلو کنگ بیتگ اَنت بلے اشانی ھمراھی ءَ دگہ گیش مردم گار کنگ ءِ ھال بیتگ اَنت-

گوستگیں روچاں سی ٹی ڈی ءَ دروگیں میڑاں بیگواھیں مردمانی جنگ ءَ پد بیگواھیں مردمانی کھولاں ترس گیشتر بیتگ اَنت –