نبشتانک: من بلوچے آں
نبشتہ کار : زھیر نور
دی بلوچستان پوسٹ
من بلوچے آں، من جنگ آماچیں بلوچستان ءَ ودّی بیتگ آں منی ڈیھ ءِ نام بلوچستان اِنت،بلوچستان ءِ چاریں پھناتاں، کوچگ، میتگ، شھر ، بازار دِمک ءُ دراہ منی لوگ انت-
بلوچستان ھما جاگہ انت کہ من اولی رند ءَ وتی چَمّ پچ کُتگ انت ءُ زند گوازینگ ءِ راھبند ھیل گپتگ، منی دل ءَ لوٹ اِیت ھمد ءَ وتی ڈیھ ءَ بہ مِراں ءُ وتی ماتیں زمین ءِ سینگ ءَ کل کنگ بہ باں ۔
چنکس سال اِنت منی ڈیھ ءَ جنگے بِنا بوتگ زورگیر مُدام مارا جَنگ ءُ بیگواہ کنگ اِنت ءُ ما ننگ ءِ جنگ ءَ ایں وتواجھی ءُ گلامی ءِ جنگ ایں، ھکل ءُ نا ھک ءِ جنگ ایں، ھمے جنگ ءِ تہ ءَ چِنکس سالونکیں سر ندر بیتگ، چِنکس بانوریں سمی جنوزام بیتگ، چِنکس کمبریں چُک چورہ بیتگ ءُ چنکس کماش”ماما کدیر پہ وتی بچّانی شوھازگ ءَ چہ کُنڈاں کپتگ انت ۔
بلے: آیاں وتی جھد یل نہ کتگ،چنکس مات چہ وتی بچّانی مراداں بے مراد بیتگ،گوں من ایشانی ھچ ھساب نہ بیت اے لڑ باز مزن اِنت بلوچ ءِ ھمک گس ھمے گرانیں درد شمار اَنت، من نزاناں اے جنگ ءِ آسر چی بیت بلے! انچو گوش اَنت یکروچے گلامی ءِ اے سیاہ ءُ تھاریں شپ ءِ آسر بیت ءُ آجوئی ءِ سھرچکیں بام ءِ رُژن تالان بیت ءُ مئے سرڈگار ءِ شھیدانی گُڈی ارمان پیلو بنت ۔
بلوچستان منی ڈیھ ءُ پمّن ءَ مھروان انت مات ءِ دروشم ءَ انت، ھما مات کہ ھر کجا زھگ ءَ وتی امبازاں زور اِیت ءُ سکی ءُ سوری پہ وت ءَ شات گل پہ چُک ءَ را بکشائیت، چہ اے ڈیھ ءِ سیمسراں ڈّن من وت ءَ را درآمدے زاناں ءُ درست پمن ءَ درآمد اَنت، بلے! وتی ڈیھ ءَ ھرچ درآمد ءِ گور ءَ من وت ءَ را وتیگے سرپد باں، من ءَ وتی ڈیھ ءِ درائیں مردم ، درچک ءُ دار، کور ءُ شیپ، مُرگ ءُ گُنگدام ، گیابان ءُ گریشگ درست چو ساہ ءَ دوست بنت، منی واھگ ھمیش انت منی ڈیھ ءَ کس درآمد ءِ مارشتانی آماچ مہ بیت۔
منی دل ءِ واھگ انت کہ منی ڈیھ سبز ءُ آباد بہ بیت، وتواجھیں ڈیھے بہ بیت مدام وشیانی نود ساچان بہ بنت ءُ ھور بہ گوار انت۔ درائیں مردم وت ماں وت تپاک بہ بنت درست یکے دومی ءِ درداں بہ مار انت، کس مونجاں مہ بیت، دراہ پہ وتی ڈیھ ءِ آبادی ءَ ھمکوپگ بہ بنت،کس مارا جست کُت مہ کنت-
“کہاں سے آ رہے ہو؟ کہاں جا رہے ہو “
ما ھما روچاں شاداں بہ ایں،کہ منی ڈیھ ءِ ھمک مردم گل بیت، کسے پہ چُنڈے نان ءَ پریشان مہ بیت ۔ کسی مردمے بیگواہ کنگ مہ بیت۔ کس دگانی سر ءَ پہ انساپ ءَ کوکار مہ کنت کسی لوگ شپ ءَ انگیر کنگ مہ بنت ءُ ترس ءَ بے واب مہ بیت، منی راج ءِ ورنا ءُ کماش ھوار تیوگیں سرڈگار ءِ وارس کجا دل اِش لوٹ اِیت پہ سیل ءُ سود ءَ تر ءُ تاب کُت بہ کن اَنت آجوئی زندگ بات ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔