کیچ : سیمسر ءِ بندی کبول نہ اِنت ، بلوچانی مالی کُشت ءُ کوش ءَ بند بہ کن اِت- عوامی تھریک

بلوچستان ءِ ضلع کیچ ءِ بُنجاھی شھر تربت ءَ سیمسر ءِ بندی ءِ بگیری ءَ سے شمبے ءِ روچ ءَ عوامی تحریک ءِ جار سر ءَ یک زھرشانی روانکے کشگ بوتگ-

روانک ءَ آل پارٹیز کیچ ، سیاسی ءُ چاگردی گلانی راھشون ءُ باسکاں بھر زرتگ-

روانک ءِ تہ ءِ مردماں شھر ءِ جتائیں دگانی سر ءَ گشت کتگ ءُ شھید فدا چار راہ ءِ سر ءَ سر بوتگ ءُ زھرشانی کتگ ئے-

ھمے وھد ءَ آل پارٹیز کیچ ءِ ڈپٹی کنوینئر فضل کریم ، بی این پی کیچ صدر میجر جمیل دشتی ، بی این پی گوادر راھشون حسین واڈیلہ ، بی این پی ءِ بُنجاھی راھشون حمل بلوچ ، پی این پی ءِ بُنجاھی راھشون خان محمد جان گچکی ، بارڈر ٹریڈ کلانچ ءِ راھشون امان جمعہ ، جماعت اسلامی کیچ ءِ امیر غلام یاسین بلوچ ، بی ایس او ءِ وائس چیئرمین بوھیر صالح ، نیشنل پارٹی کیچ ءِ نائب صدر طارق بابل ، عوامی نظریاتی تھریک ءِ راھشون حاجی ابراھیم جوسکی ، نوید نصیر ، یعقوب جوسکی ، صادق فتح زامرانی ، پیک اپ ٹرانسپورٹ ایسوسی ایشن ءِ صدر ، گوستگیں تھسیل ناظم بلیدہ ءُ گوستگیں میر جے یو آئی (ف) کیچ مولانا نصیر احمد ، دو ھزار ءُ زمیاد ایسوسی ایشن کیچ ءِ صدر وسیم سفر زامرانی ءُ دگہ مردماں گپ ءُ تران کنان ءَ گْوشتگ کہ سیمسر ٹریڈ مئے پُشتی کار ءُ بار اِنت کہ ھزرانی سالاں برجاہ ءُ ھست اِنت بلے اے کار ءُ بار دیم دارگ ءَ جتاجتائیں ھنر ءَ چہ بند کنگ ءِ جُھد کنگ ءَ اَنت برے ٹوکن وڑ ءَ بند کنگ بیت برے ای ٹیگ ءِ سوب ءَ چہ پالیسی کنگ بیت اے سرجمیں ھُنراں ھمے ھاتر ءَ کارمرز کنگ ءَ اَنت داں مارا تنگدستی ءِ نیمگ ءَ دور بدے اَنت-

اھاں گْوشتگ کہ سیمسرانی جھمنند جتائیں جیڑاھانی دیمپان اَنت اھاں جتائیں ھنراں چہ دلسیاہ ءُ تنگ کنگ ءَ اَنت ، جھان ءَ سیمسر ءِ نزیکیں میتگاں وڑ وڑیں آسراتی دیگ بوتگ بلے بدبھتی ءَ اد ءَ دُرست بزگ ءُ وار اَنت –

زھرشانی کنوکاں گوشتگ کہ سیمسر ءَ پیسرگیں وڑ ءَ پچ بہ من اَنت ھاسکار راج ءَ کار ءُ بار ءِ موکل دیگ بہ بیت اگاں ناں گُڑا زھرشانی درچ دیمتر ءَ ھم برجاہ بیت-

زھرشانی کنوکاں لوٹ کتگ کہ سیمسر ءَ ٹوکن ءُ ایٹیگ سسٹم ءَ سرجم ءَ ھلاس کنگ بہ بیت چریشی ءَ ای ٹیگز ءُ ٹوکناں ءِ سبب ءَ چہ برات برات وت ماں وت گورجیگ گورجیگ اَنت ءُ وت ماں وتی دشمنی ودی بوگ ءَ اِنت-

اھاں لوٹ کتگ کہ تیاب دپ ءُ سیمسر بلوچستان ءِ راج پت ءُ پیروکی میراث اَنت آھاں آجوئی ءِ وڑ ءَ وتی کار ءُ بار کنگ ءِ سرجمی ءَ ھک دیَگ بہ بیت وھدے کہ سیمسر پیسرگیں وڑ ءَ سرجم ءَ پچ کنگ بہ بیت ھاسکار راج ءَ کار ءُ بار ءِ موہ دیگ بہ بیت ءُ سیمسر ھمینچو کار ءُ بار ءِ کراسنگ ڈس بوتگ اَنت آ دوبر پچ کنگ بہ بنت-

زھرشانی کنوکاں پاکستانی ءُ ایرانی بلوچستان ءِ مردماں وت ماں وتی سیادی ھست اَنت کہ آ آروسی مچّی ءُ دیواناں ھر وھد ءَ آھگ ءُ روھگ ءِ ھچ وڑیں مکن کنگ مہ بیت ءُ ایران ءَ چہ ورگی توژگ دگہ بے تاوانیں ساز ءُ سامان ءِ آرگ ءُ برگ ءِ موہ دیگ بہ بیت-

اھاں وتی لوٹ ءِ تہ ءَ سیمسر ءَ دگ سر ءَ ھستیں چیک پوسٹوں لَس مھلوک ءُ سیمسر ءَ کار کنوکیں ڈرائیورانی گوم ءَ بے ادبی ءُ زلیلی ءِ ھلاس کنگ ءِ لوٹ ھم کتگ-