نبشتانک: آزمان سیاہ ءُ تَھار اَت
نبشتہ کار: شاھد اھمد بلوچ
دی بلوچستان پوسٹ
من واب ءَ پاد اَتکّگ ءِ تاں واہ ءُ زارانی توار منی گوشاں پیداک اَت من کوٹی ءِ تَھا اِت آں چَہ ڈَنْ مَھلوکانی توار ءُ ڈیژ ءُ ڈاژْ ھم پیداک اَت چَہ جَبین ءَ تُرس میزان میزان ءَ ودّی بوان بوت ءُ پد ءَ منی دَپْ ھم پَچْ اَت دوئیں دست بُرز ءَ شھاران کُت اَنت دیم پہ دَریگ ءَ ھمے سَھت ءَ یک بلاھیں چیزّے ءَ توار کُت من پُشت ءَ کِنز اِت آں۔
چَہ کوٹی ءَ ڈَنْ بازیں چیزّے بوّگ ءَ اَت من ءَ ھچ سرپدی نیست اَت بلے داں کہ من بزاناں ڈَنّ ءَ چے بوّگ ءَ اِنت گڑا منی تُرس ءَ آسودگی رَسّ اتگ اَت اک: چہ تُرس ءَ من پَٹ ءُ پول بندات کُت داں کہ من پُوہ مہ باں، گڑا من ءَ اے نادْراھی نئیل اِیت۔
منی تکانسری ودّان بوھان اَت، اے کوٹی گیشتِر تُرسناک بوان اَت ءُ منی پوہْ چوں گاریں گنوک ءَ اَت، کس نیست اَت بس ڈَنْ ءَ واہ ءُ زاری اَت ایشی ءَ چِہ ابید دَرّیگے شَمّاں روژ ءِ رژنایے گار بوان اِت اَنت ءُ کوٹی ھم تھاری ءَ مانشانتگ اَت منی تُرس ءَ کم بوگ ءِ نام نیست اَت من ءُ منی تُرس نادْراھی ءَ گیش کنان اَت۔
من، منی تُرس ءُ تھاری ھاموش کنگ ءَ اَت ڈَنْ ءَ مھلوکانی توار ھم گار بوھان اَت ءُ چَہ ھاموشی ءَ من تَسّلّ ءَ زورَگ ءَ اِت آں۔ تُرس ءَ منی جبین ءِ تہ ءَ نوکیں نوکیں سما وَدّی کنگ ءَ اَت منی ارواہ ءَ تُرس ءِ سما بوّگ ءَ نوکیں تام ءُ لِزّت دیگ ءَ اَت ھمے سھت ءَ منی ھاٹیگ گیشاں چَہ گیش نوکیں رنگے ءَ ودّان کنگ ءَ بوت۔
منی پاد ھوشتات اَنت دیم پہ دَرّیگ ءَ شُتّ اَنت دوئیں دست شھار اِت اَنت دَریگ پَچْ کُت ءُ گوں تَھاریں سیرکَگّیں ڈاکے اَت، نہ اِد ءَ مَھلوک اَت ءُ نہ اِد ءَ واہ ءُ زاری اَت بَس آزمان سیاہ ءُ سوروند اَت ءُ من ھَبکہ بوت آں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔