کراچی : زورانسری آوار جنی ءِ بگیری ءَ گپ ءُ تران بلوچستان ءِ بیگواھیں مردمانی کھولاں بھر زرتگ

سندھ دارالھکومت کراچی ءَ شمبے ءِ روچ ءَ ڈیفنس آف ہیومن رائٹس ( ڈی ایچ آر) برجم داشتگیں زورانسری آوار جنی ءِ جیڑہ ءِ سر ءَ صوبائی ءِ شوری کانفرنس برجم داشتگ-

برجم داشتگیں دیوان ءَ سرجمیں ملک ءَ چہ سیاسی راھشون ، وکیل ، انسانی ھکّانی باسک ، زورانسری آوار جنیاں چہ اَسر کپتگیں کھول ءِ باسکاں بھر زرتگ-

دیوان ءِ مول ءُ مراد پاکستان ءَ چہ زورانسری آوار جنی وڑیں جرم ءِ ھلاس کنگ اِنت-

دیفینس آف ہیومن رائٹس سرجمیں پاکستان ءَ بیگواھیں مردمانی ھاتر ءَ جُھد کنگ اِنت وھدے کہ لھتے گل صوبائی ءَ کار کنگ ءَ اَنت –

گپ ءُ تران کنوکیں مردمانی رِد ءَ دیوان ءِ مول مراد اے سرجمیں گلانی مالومداری ءَ یکجاہ کنگ یک انچیں شپارشتے سرجم کنگی اِنت کہ آئی ءِ سوب ءَ زورانسری آوار جنی ءِ وڑیں گنتریں جرم ءَ چہ پاکستان ءَ ھلاس کُت بہ کن ایں-

دیوان ءَ ساڑی ئیں مردماں زورانسری آوار جنی ءِ سرجمی ءَ ھلاس کنگ ءِ ھاتر ءَ ھرکس وتی شور ایر کتگ اَنت-

دیوان ءَ بلوچستان ءَ چہ بیگواھیں انسانی ھکّانی باسک راشد حسین ءِ مات ءُ بیگواہ ڈاکٹر دین محمد بلوچ ءِ چُک ءُ وائس فار بلوچ مسنگ پرسنز ءِ راھشون سمّی دین بلوچ ھم ساڑی بوتگ-

دیوان ءَ ساڑی ئیں مردماں پاکستان ءَ زورانسری آوار جنی ءِ سر ءَ وتی ھیال ءُ لیکہ درشان کتگ ءُ گْوشتگ کہ اے وھد ءَ ڈیھ ءَ بیگواھیں مردمانی جیڑہ روچ پہ روچ گیش بوان اِنت ءُ زورانسری آوار جنی ءِ سر ءَ راہ ءُ راھبنند ءِ نہ بوھگ دلپدردناک اِنت-

آھاں گْوشتگ کہ مردماں زورانسری آوار جنی ءِ نشانگ کنگ آجوئی ءِ درشان ءِ سر ءَ گر ءُ دار کنگ ءَ اَنت-