نبشتانک: نوں مارا مزار نیست اِنت
نبشتہ کار : بھادُر بلوچ
اولی بھر
دی بلوچستان پوسٹ
مُدّتے بیت کہ ند پہ نبشتانکے ءِ نبشتہ کنگ ءَ دست ءَ نہ کتگ، امروز ءِ کسانیں کسانیں کار ءُ دزگٹّیاں مردماں وتی وڑ ءَ کتگ، مَجّگ ءَ اوں گُش ئے پیسریگیں وڑ ءَ کار یلہ داتگ، چوناھا لبزانکی مارشتانی انچیں زورے کہ مردماں پہ ھاموش بوّگ ءَ وت نیل ایت بلے باور بہ کن اِت ماھو کہ منی دگنیا اِنت، چوشیں ساھتے نیست کہ چرآئی ءِ مِھروانیں مھراں بے ترانگ بہ باں، شَھرّنگیں ھون ءِ تہ ءَ آئی ءِ یات اَنت کہ گردش کن اَنت یا کہ ایدگہ دگنیا ءِ وئیل ءُ جاور بہ بنت بلے ھرام اِنت اے سُن بیتگیں ساہ پہ کَسّے ءَ ٹُکّرے اوں نبشتہ بہ کنت بلے مرچی اے کجام زور اَنت کہ دستے لنکُکاں وت ھبر پرماھگ ءَ اَنت، دل ءُ دماگے تہ ءَ بے چاڑی یے داب ءَ ایر کپتگ کہ بہ لِک، مرچی وتی ھاموشی ءِ دگنیا ءَ کَروج ایت ءُ سُن مہ بیت کہ پہ تو نوں ھچ نہ مَنّ اتگ، مھشر ءَ دگہ کانٹے پِر نیست، آزمان چد ءُ گیش ایر نئیت، مہ تُرس، دل مجن، نبیسّان بہ کن۔
بلوچستان کہ یک جنگی جاورے ءِ تہ ءَ اِنت، بلوچ وتی راجی ھستی ءُ راجی تباھی ءِ میان ءَ جاورانی تہ ءَ اِنت، اے جنگ ءَ اگاں بلوچ گوں وتی جنگی رِپک ءُ ھُنراں چہ دژمن ءَ گیش شیوار بوت، جنگی سرجمیں لوٹانی پیلو کنگ زانت، گڑا باندات ءَ آ وتی راجی ھستی گوں زندگ بوت کنت اگاں دژمن ءِ جنگی چال بلوچ ءَ نہ پھم اِت اَنت گڑا بزانکہ بلوچ ءِ باندات یک تھاریں تباھی یے نیمگ ءَ روان اِنت مرچی بیست (یا کمیں گیش) سال ءِ بلوچ راجی آزاتی ءِ گھگری ءَ بلوچ ءَ یک گِھیں کُتھکاری (تَجرْبَگے) داتگ، گْوستگیں پانزدہ بیست سالانی جنگ ءَ نگدی یے چمّاں بچار ئے تاں بے کِساس سوبمندیاں ھوار ، البت بے سوبیانی اوں یک مزنیں بھرے ھست اِنت۔
چیرجنگ (گوریلہ جنگ): چیرجنگ ءِ لوٹ، جنگی مول ءُ مُراد ھوار آئی ءِ مُسام (ڈسپلین) نہ بوگ (یا باز کم) برابر ءَ بوتگ اَنت۔ جنگی لوٹ ءُ مُراداں گیش جُھدکاراں وتی تب ءِ پد ءَ جنگ داشتگ۔ ھمے نازانتیانی سوب اِنت کہ مرچی ما اے جاہ ءَ سر بوتگ اِیں۔ بلے جست ایش اِنت کہ زاناں نوں چے کنگ لوٹ ایت؟ ھمے جست ءِ پسہ ءَ وھدے کہ ما مرچی بلوچ سرمچارانی کارپدانی (کاروائیانی) بنیات ءَ چار ایں گڑا سما بیت کہ اے وھد ءَ بلکیں بلوچ جُھدکاراں اے جُست کمّیں ورگ ءَ اِنت کہ جنگ گوں نوکیں پِڑ ءُ کارانی بنیات ءَ کم ءُ باز مٹ بوتگ۔ جنگی رپک ءُ ھُنر گیش گندگ ءَ کئیت اِنت۔ بلوچ چیرجنگ ءِ بُندری لوٹ ءُ بنیات ءَ دژمن ءِ سر ءَ انچیں وھد، انچیں جاہ، انچیں کارپدانی بنیات ءَ اُرش کنگ ءَ اِنت کہ اے چہ آئی ءِ ھیال ءُ گُمان ءَ ڈن اَنت ءُ مرچیگیں اے جنگ ءِ شون دیوک پوزیشن ءَ بلوچ ورناھانی ھم یک ھاسیں کردے ءُ بھرے ھست۔
چہ ساھتے ءَ پیسر ھر روچ ءِ ڈولءَ من وتی سنگتانی دیوانے ءَ نشتگ اِت آں، روچ ءَ ایر داتگ اَت ءُ آزمان نوں استالاں سبھینگ ءَ اَت، چاہ ءُ چلیم اَت، گپ ءُ تران ، کندگ ءُ مزاک اَت بلے بامرد (کہ گپ ءُ مسکرایانی مُدام بھرے بوتگ) مرچی بے توار ءُ ملور ات، کمّیں منی گور ءَ کِنز اِت ءُ وتی گْوانکو منی دیم ءَ ایر کت ئِے۔ گُڑا جُست ئِے کُتگ “تو اے ھالءَ سرپد ئے؟” من ھچ نہ گُشت ءُ نوں مئے ھردوانی میانءَ ھاموشی یے ودی بوت۔
مزار جان ءِ اَکس اِنت، وتی ڈیھ ءِ ھاک ءَ گوں انچو پیوست اِنت کہ ماتے وتی زھگ ءَ پہ بَلاہ زور بہ بیت۔ یک ایردستیں چاگردے ءِ ھکّی ئیں آشوبکار ھمیش اَنت، دژمن ءِ چمّانی تہ ءَ چم ایر کنگ، ھزاراں جنجالاں گوں زند گوازینگ، ھر روچ زند ءُ مرگ ءِ نیام ءَ زندگی کنگ وَ کمال اِنت۔ بہ گِند ئے چہ زبان ءَ اُپے اوں نہ کش اَنت۔ دژمن ھمے کہ سرمچارے شھید کنت، گَل ءَ بال بیت کہ مرچی من سرمچارے جتگ بلے اے نہ زانت کہ آشوبیانی زند چہ مرگ ءَ بندات بیت۔ اے جون کہ گوں وتی ڈیھ ءَ چو پیوست اِنت، دیم پہ دیمی جنگ ءَ شھید بوتگیں زندگی وَ کسے ئیگ اِنت، اے ھما کس اِنت کہ آئی ءَ ھزار بار اے سُھر سریں تیرانی دیمپانی کتگ ، اے یک تمردیں سپاھی یے ءِ جون اِنت، یک جنگی استادے ءِ ، استاد بگندئے جسمانی رنگ ءَ رپتگ بلے آئی ءِ جنگی ازم بِھ مُرت نہ کنت۔ بِگِند ئے آئی ءَ زی ھم بلوچستان ءِ تہ ءَ پوجی بُنجل مان رُپتگ ءُ برتگ اَنت ءُ باندا ھم آئی ءَ چہ گیش ھمے کار ءَ گوں نوکیں دْروشمے ءَ برجاہ بنت دمانے پیسر ءَ مئے سیاسی دیوان سیاسی ڈسکیشن کنگ ءَ اَت “انٹرنیشنل سیاست ءِ بدل بؤکیں تب ءِ سر ءَ گپ اَت، آتراپ (ریجن) ءِ مٹ بؤکیں جاور ءُ آیانی بلوچستان ءِ سر ءَ آؤکیں سانانی (اسراتانی) سر ءَ گپ اَت، دومی نیمگ ءَ اے یک مزنیں بیمّے مارگ بوگ ءَ اَت کہ چائنہ ءُ ایدگہ تاکتوریں ریاست مارا (بلوچاں) چو اژدھا ءَ ایر بر اَنت ،بوت کنت پہ بلوچ ءَ ھچ پشت اوں مہ کپ ایت، دیمروئی ءِ نام ءَ ڈیھ ءِ مڈی جتائیں پروگرامانی لالچ ءَ لٹ ءُ پل کنگ بوّگ ءَ اَنت، “ڈیوائیڈ اینڈ رول” والا پالیسی ءَ پاکستان تاں مرچی کارمرز کنگ ءَ انت، بلوچ ءِ ڈیھ ءَ بھر ءُ بانگ کنگ ءَ اِنت، ھَندی مھلوکاں لڈینگ ءُ آیانی جاھاں وتی مھلوک ءَ آرگ ءَ اِنت، پہ وتی کار ءُ باری رھبنداں ءُ جاگیرداری ءِ مھکم کنگ ءَ اے وھداں سی پیک ءِ روٹ وسیلہ ءَ بے کساس کار کنگ ءَ اِنت، ایسٹ، ویسٹ ءُ سنٹرل روٹانی مھلوک چہ وتی ڈیھ ءُ ڈگاراں زبھر بوگ ءَ انت ءُ دگہ دگہ-
بہ گِند ئے دیوان ءِ سنگتانی گپ وَ شوک اَنت کہ چریشی ءَ سنگت وتی ڈیھ ءِ جاور ءُ جنز ءِ ھستیں بستار ءَ با ھبر بوگ سک شر اِنت، کم چہ کم مردم آزات ھیال ءُ رد ھیالی (خوشفھمی) ءِ تہ ءِ روگ ءَ وَ رَک اَنت بلے دومی نیمگ ءَ بامرد ءِ گْوانکو انگت منی دست ءَ اِنت، مزار بیمّیں ورنا اوں ڈیھ ءِ بھت ءَ کپتگ، انچیں مُھکمیں پکرانی واھُند اَنت کہ دنیا ءِ سپر پاور اش چیلینج کتگ اَنت، چہ زورآوراں پنڈگ لوٹگ ءَ نہ اَنت، زر ءُ پِنڈ ءَ ھم لوٹگ ءَ نہ اَنت بلکیں وتی بولان ءِ آبشارانی گپ ءَ اَنت، ساجی ءِ کُمبانی داوا کنگ ءَ اَنت، پہ سلیمان ءِ میزّریں پٹ ءُ دیاراں جنگ ءَ اَنت، چوش ھم نہ اِنت کہ چہ زورگیراں وتی ہھک ءَ پنڈگ لوٹگ ءَ اَنت، یا کہ چم اش گوریچان ءُ رو ایرکپتءَ داشتگ اَنت کہ پہ ما نوکیں بانداتے چہ دگہ نیمگے ءَ وت کیت۔ اناں، بلکیں گوں دژمن ءَ دژمن ءِ زبانءَ ھبر کنگءَ اَنت چیئرمین گلام محمد ءِ گُشتین اِنت کہ اے جنگ مئے سر ءَ بُنگیج کنگ نہ بوتگ بگندئے ایشی ءِ بِندات ما وت کتگ۔ پمیشکا سنگتاں آئی ءِ بار مرچی وتی کوپگاں وت زرتگ اَنت مرچی دژمن ءَ را اے باور کنائینتگ اش کہ تو وتی سِلاھاں ھرچی آس دات کن ئے آس بہ دئے بلے اے ودار ءَ مہ بو کہ ما ایشانی بیر ءَ پہ تو پل ءُ گلاب ءِ شان اِیں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔