شال: ھوشاپ وئیل ءَ نمیران بیتگیں زھگانی لاش شہدائے بلوچستان ءِ مانشجاہ ءَ گلزمین ءِ باھوٹ ءَ کنگ بیتگ اَنت

ھمے سال ءِ دَہ اکتوبر ءَ بلوچستان ءِ دمگ کیچ ءِ ھند ھوشاپ ءَ پاکستانی سیکورٹی پورسز ایف سی ءِ گولہ باری ءَ بیران بیتگیں زھگانی نماز جنازہ ءِ وانگ ءَ پد سَے شمبے ءِ روچ ءَ شال ءِ دامن ءَ ھستیں شہدائے بلوچستان ءِ مانشجاہ نیو کاھان ءَ گلزمین ءِ باھوٹ کنگ بیتگ اَنت –

نماز جنازہ ءَ زالبولاں ھوار دگہ مردماں بازیں کچے ءَ بھر زرتگ ءُ اے وھد ءَ بلوچی آشوبی راجی سوت وانگ بیتگ ءُ میت دروتی ندر کنگ بیتگ اَنت –

مردماں بلوچستان ءَ پوجی آپریشن، زھگ، زالبولانی کوش ءُ زورانسری آوار جنی ءِ ھلاپ ءَ اوگام جتگ اَنت –

زانگ بہ بیت ھوشاپ ءِ ناوشیں وئیل ءَ بیران بیتگیں زھگانی کھول گوستگیں نُھ روچاں زھرشانی ءَ بیتگ اَنت ءُ آیاں لھتے لوٹ پیش کرتگ اَنت بلے دمگدار، اُستانی سرکار ءُ سیکورٹی پورسز ءَ ھشت روچاں داں اے گپ ءِ منگ ءَ انکاری کتگ کہ زھگانی مرگ گولہ باری ءَ بیتگ اَنت-

بلوچستان ءِ بنجاھی شھر شال ءَ ریڈ زون ءَ گورنر ھاؤس ءِ دیم ءَ کھول ءِ نندانک ءَ پیش کنگ بیتگیں ھکانی لوٹ ءَ شال ءِ شھر داں دو روچاں تھی دگ بند کنگ بیتگ ءُ روانی مھتل کنگ بیتگ اَنت ءُ اُستان ءِ دگہ شھراں زھرشانی کنگ بیتگ اَنت ھمے وڑ ءَ کھول ءَ لاشانی زیرگ ءُ اسلام آباد ءِ روگ ءِ گوشتگ اَت-

دو شمبے ءِ روچ ءَ بلوچستان ھائی کورٹ ءِ چیف جسٹس نعیم اختر افغان، جسٹس عبدالحمید بلوچ ءَ ھواریں یک بینچے ءَ ھوشاپ ءِ وئیل ءَ بیران بیتگیں زھگ سرکاری شھید نامینتگ اَنت ءُ پرزوری ءَ ڈی سی کیچ حسین جان، اسٹنٹ کمشنر عقیل ءُ لیویز تھسیلدار تربت کش اِتگ ءُ ایڈینشل سیکرٹری داکلہ پرمان کرتگ اَت کہ زھگانی کھول سرجمی ءَ نگھپانی ءَ دمگ ءَ روان دیگ بہ بیت اِنت –

ھمے وڑ وئیل ءَ زدگ بیتگیں سیمی زھگ سرکاری ھرچ ءِ سر ءَ درمانی کنگ ءِ پرمان کتگ اَت ءُ ایف آئی آر نامینگ ایف سی ءِ سر ءَ نبشتگ کنگ ءِ پرمان کرتگ اَت، آمیدگسی پرمان ءَ پد کھول ءَ زھرشانی نندانک آسر کتگ اَت –