تربت یونیورسٹی ءُ آئی ءِ واکدار – میرو بلوچ

نبشتانک: تربت یونیورسٹی ءُ آئی ءِ واکدار

نبشتہ کار: میرو بلوچ

دی بلوچستان پوسٹ

تربت یونیورسٹی ءَ چیزے انچیں وئیل ردوم زیران انت کہ سگ ءُ اوپار ءَ چہ ڈن انت ءُ ایش پد ماں پد ءَ سھرا بوگ ءَ انت بلے نابودیں ایڈمنسٹریشن اے وئیلاناں پہ کزد ڈالگچار کنگ ءَ انت، یک گپے چو روچ ءَ پدر انت کہ ایڈمن وتی سیاہیں کرتن ءُ کارستانیانی چیر دیگ ءِ سبب ءَ نودربراناں سیاسی پیلٹ فارم ءُ نودربر یونیاں چہ دور دارگ ءِ جھد ءَ انت-

آ لوٹ اَنت کہ نودربر در راجکاری (Depoliticize) سنچے ءِ واھند بہ بنت دانکہ آ اے وڑیں سنچے مہ دار انت کہ باندا روچ مئے گٹ ءَ لوپ بہ بنت، پرچاکہ آ نہ لوٹ اَنت کہ نودربر منی دروگ ءُ سیاہ کاریاں پاشک بہ کن انت، پرچا کہ ایڈمن ءِ گوک دز انت-

نی پمیشکا نودربراناں سیاست کنگ ءِ ھاتر ءَ بیھار دیگ ءِ جھد ءَ یکوئی کنگ ءَ انت کہ آ راست ءُ دروگ ءِ میان ءَ پرک ءُ پیرے کت مہ کن انت۔

ایڈمن نہ لوٹ ایت کہ نودربر وتی بنکی ھکاں چہ زانندگ بہ بنت ءُ نہ لوٹ ایت کہ سیاسی سنچے نودربرانی توک ءَ ودی بہ بیت، نہ لوٹ ایت کہ نودربرانی توک ءَ ساچشتی سنچ ءُ سماھے ئے جَھ بہ جنت-

آ تھنا لوٹ ایت کہ نودربرانی ذہن موچ (مفلوج) بہ بیت پمیشکا ھر وھد ءَ اے وڑیں آواز ءِ پاد آیگ ءَ پیسر بے توار اش کن اَنت بلے داں چنت ءُ چون ءَ بے تواری مان ایت؟ ہمنچو دیوال مک کنگ بہ بیت دو ہمنچو توار برزتر بیت ہمنچو کہ کنٹگ راھانی سر ءَ بہ ریچ ایت دو ہمنچو گپچالانی دیمپان بیت۔

ایڈمن ہر وھد ءَ پہ کزد نودربرانی جیڑھاں ڈالگچار کنگ ءَ انت، آ توری مِس ءِ ورگانی جیڑہ بہ بیت یا نیٹ ءُ کلاسانی یاکہ ٹرانسپورٹ ءُ دوارگسانی (ہوسٹلز) حالانکہ ایش وَ انچائیں جیڑہ انت ایشاں چہ مستریں جیڑہ ھست بلے آ وَ انگت باز دوریں گپ انت ایڈمن نودربرانی بنکی ھکاں دات مہ کنت گڑا کجام درد ءِ دوا انت۔

تربت یونیورسٹی ءَ پہ زانت بت گونگیں مردم آورتگ ءُ نادینتگ انت، آمر تبیں مردم انت کہ کس نزانت مئے دائرہ ءِ کار کجام انت سیکورٹی انچارج رجسٹرار ءِ کار ءَ کنگ ءَ انت ءُ رجسٹرار سیکورٹی انچارج ءِ کاراں گوں سلے ولے انت۔۔ چوشیں درور باز انت کہ دگرانی جاگہ دگہ مردم وتسر ءَ وت دزمانجنی کنگ ءَ انت۔

تربت یونیورسٹی ءَ نوں روچ پہ روچ وئیل ءُ جیڑہ ودّان انت اے گوستگیں وہد ءَ ہم پیش اتکگ انت بلے نوں آپ اش گواز کتگ ھالانکہ اے وئیلانی زنگ ءُ گلگ نامگ ایڈمن ءَ سر کنگ بوتگ انت بلے آیاں مدام ڈالچار کتگ انت تربت یونیورسٹی یک انچیں دمگے ءَ چہ سیادی داریت کہ اود ءَ گیشتریں نودربر بلوچ انت، چوشکہ بلوچ ءِ وتی ربیدگی تبے، وتی دودمان ءُ راجمانی راہبندے اگاں یونیورسٹی ءِ توک ءَ چوشیں وئیلانی گر ءُ دار مہ بیت تاں باندا روچ کسی ننگ ءُ ناموس پش نہ کپ ایت۔

یک وئیلے زیکیں روچ ءَ دیم ءَ اتکگ (چوشکہ کہ ھمے یکیں وئیل انت کہ پد ماں پد ءَ بوگ ءَ انت بلے ایڈمن ءِ بے تواری مانایے داریت) سیکورٹی انچارجءِ، شپ ءِ پاد اتکگیں وئیل ءِ سر ءَ داں سبارگ ءَ کس ءَ ہچ نہ گشتگ، ورگ گراد ءِ شری بوتگ کہ آ وت چہ یونیورسٹی ءَ تتکگ ءُ شتگ وزیر ءِ یکیں رند ءِ جیڑہ نہ انت بلکیں ایشی ءِ کر ءَ سَے چار کاردار بوتگ انت آیانی ہم گلگ ہمے بوتگ کہ وزیر مئے گوما بد فعلی کنت چوشکہ ایڈمن ہم سھیگ ءُ سرپد بوتگ بلے گوشاں کر ءُ چماں کور مرچی اے وئیل مس ءِ توک ءَ پاد اتکگ باندا کلاس رومانی توک ءَ سر بیت کت کنت مروچی ءَ چہ انگت مھلہ سر ءُ چٹ گرگی انت، نودربراناں وتی توار اے بت گونگیں ایڈمن ءِ ھلاپ ءَ چست کنگی انت پرچہ کہ ایشی ءِ مستریں زمہ وار ایڈمن انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔