روکپتی بلوچستان: تیرگواری ءِ وئیلاں یک زھگے بیران، یکے زدگ

سر بیتگیں ھالانی رد ءَ روکپتی بلوچستان ءِ دمگ سراوان ءَ ناشناسیں مردماں تیرگواری کنان ءَ یک کسان سالیں زھگے کُشتگ –

گیشیں ھالانی رد ءَ ناشناسیں مردماں سراوان ءِ دمگ دزک ءَ تیرگواری کرتگ ءُ یک زھگے کُشتگ –

کُشگ بیتگیں زھگ ءِ پجار سعید سپاھیان مھمد علی جھمنند دزک ءِ نام ءَ زانگ بیتگ –

ھالانی تہ ءَ گوشگ بیتگ کہ اشی ءِ سر ءَ ھما وھد ءَ تیرگواری کنگ بیتگ کہ آ ڈن ءَ دکان ءَ روگ ءَ بیتگ ناگتاں ناشناساں آئی ءِ سر ءَ تیرگواری کرتگ ءُ کشتگ –

ھمے وڑ ءَ روکپتی بلوچستان ءِ تیابدپی شھر چھبار ءَ سلاہ بندیں مردمانی تیرگواری ءَ یک زھگے زدگ بیتگ –

ھالانی تہ ءَ گُشگ بیتگ کہ سلاہ بندیں مردماں فلکہ شیلات چھبار ءَ تیرگواری کرتگ ءُ اود ءَ یک زھگے زدگ کرتگ –