ھوشاپ ءَ زھگانی کوش: بیست ءُ چار اداراں مئے لوٹ منّگ نہ بوت اَنت اسلام آباد ءَ زھرشانی ءَ رویں

بلوچستان ءِ بنجاھی شھر شال ءَ ریڈ زون ءَ ھوشاپ ءِ وئیل ءَ شھید بوتگیں زھگانی کھول ءِ زھرشانی مروچی چارمی روچ ءَ برجاہ بوتگ –

اے وھد ءَ بلوچ یکجھتی کمیٹی ءِ رھشوناں ڈاکٹر مھرنگ بلوچ ءُ دگہ مردماں کھول ءِ ھمراھی ءَ پریس کانفرنس کنان ءَ گوشتگ کہ اگاں بیست ءُ چار ادارانی میان ءَ مئے لوٹ منّگ نہ بوت اَنت زھرشانی کنان ءَ دیم پہ اسلام آباد ءَ رؤئیں ھمود ءَ نندانک ءَ نندیں –

پریس کانفرنس ءَ تران ءَ کنان ءَ ڈاکٹر مھرنگ بلوچ ءِ گوشگ ات کہ یک کھول ءِ کہ آئی ءِ ھپت مردم پیسر ءَ جنگ ءُ کُشگ بوتگ انت ءُ پد ءَ ھمے کھول ءِ دگہ دو زھگ پوج ءِ نیمگ ءَ آس داتگیں ماٹر گولھاں شھید بوتگ – اے زوراکیاں چہ رکگ ءِ ھاتر ءَ اے کھول ءِ کماش بازیں جیڑہ ءُ جنجالاں پد تربت ءَ چہ شال اتکگ انت کہ نیم راہ ءَ زورانسری دارگ ءِ جھد ھم کنگ بوتگ –

آ چہ تربت ءَ شال ءَ ھمے امیت ءَ اتکگ انت اگاں تربت ءَ اھوالکاراں کوریج دیگ ءَ جیڑھانی دیمپانی انت بوت کنت شال ءَ آھانی پریات گوشدارگ بیت – پرچاکہ آئی ءِ کھول ءَگوستگیں بازیں سالاں زوراکی ءِ نشانگ بوگ ءَ انت بلے بژنی گپ ءِ کمے میٹر ءَ دور نشتگیں اھوالکار اے زھگانی جوناں کوریج دیگ ءَ بے سوب بوتگ انت –

آئی ءَ گوشتگ کہ بلوچستان ھاسکر مکران ءَ بس گوستگیں یک سالے ءِ تہ ءَ پوج ءِ دست ءَ انسانی ھکانی لگتمالی ءِ بازیں وئیل دیم ءَ اتکگ اَنت کہ مردمانی زورانسری اوار جنی، بید وارنٹ ءَ مردمانی گسانی سر ءَ بیڑ برگ ءُ چادر چاردیوالیانی لگتمالی، کراچی یونیورسٹی ءِ نودربر حیات بلوچ ءِ کوش ءَ بگر تاج بی بی تاں مردماں روچ رھمانی تیر آماچ کنگ ءُ شھید کنگ ءُ لس مھلوک ءِ سر ءَ تیر گواری یا ماٹر گولہ آس دیگ ھمک روچی کارے جوڑ بوتگ اَنت –

آئی ءِگوشگ ات کہ بلوچستان ءِ سیکورٹی پوج ءُ ھاسکر ایف سی سرجمی ءَ یل کنگ بوتگ کہ ھمک روچ سنگینیں انسانی ھکانی بگیری بوگ ءَ انت ھما وئیل رسانک ءِ چماں اندیم انت آ بئے نہ انت بلے ھما کھولاں ترس ءُ بیھارانی پرواہ نہ کتگ ءُ وتی کھولانی کوش ءِ بگیری ءَ توار چست کتگ نوں مردم وتی بے گناھیں مردمانی جونانی کل کنگ ءَ دم برتگ ءُ اے درچ یکشل ءَ برجاہ انت اوشتگے نام ءَ نہ زانت ھمے ھاتر ءَ نوں بلوچاں وتی جونانی کل کنگ ءَ انکار کتگ –

واجہ مھراب کہ آئی ءِ نماسگانی جون گورنر ہاؤس ءِ دیم ءَ ایر انت آئی ءَ وتی کھول ءِ پیسر ءَ بازیں مردمانی جون کل کتگ اَنت بلے نی آ ھک لوٹ ایت ءُ ھک رسگ ءَ ابید وتی زھگانی جونانی کل کنگ ءَ انکاری انت –

آئی ءَ دیمتر ءَ گوشتگ کہ مھراب ءَ تربت ءِ تہ اللہ بخش ءُ شراتون ءِ جونانی ھمراھی ءَ سَے روچ ءَ زھرشانی کتگ بلے اود ءِ انتزامیہ ءَ ڈی سی ءِ کرد ھمے بوتگ آھاں ایف سی ءِ ترجمانی کتگ – مردماں بیھار دیگ آھاں ھچ نگوشگ ءِ واست ءَ لاچ دیگ ءَ بوتگ انت وھدیکہ کھول ءَ وت ءَ شال ءَ سر کتگ ءُ ھک ءِ ھاتر ءَ وتی لوٹ دیم ءَ آؤرتگ انت آھانی لوٹ ملکی کانود ءُ رھبندانی رِد ءَ انت – بلے شال ءَ گوستگیں چار روچاں گورنر ہاؤس ءِ دیم ءَ نندانک جنگ ءَ ابید سرکار ءِ نیمگ ءَ ھچ وڑیں گامگیج زورگ نہ بوتگ اَنت- سرکار ءِ رویہ ءُ گیر سنجیدگی ءَ اے گپ پدر انت سرکار ملکی کانود ءُ رھبندانی رِد ءَ شھری مردماں ھک دیگ ءَ سرجمی ءَ بے سوب انت – ریاست ءِ بے حسی ءِ گندگ ءَ کھول ءُ زھرشانی منوگراں ھمے پیسلہ کتگ کہ نوں ترندیں گامگیج ءِ زورگی انت – آئی ءَ گوشتگ کہ سرکار ءَ بیست ءُ چار ادارانی مھلت دیگ بیت انت کہ مئے لوٹاں الکاپی ءَ دلگوش بہ دنت –

ڈاکٹر مھرنگ بلوچ ءَ گوشگ ات کہ بیست ءُ چار ادار ءَ پد کھول پہ ھک ءِ ھاتر ءَ اسلام آباد نیمگ ءَ پند جنت ءُ اسلام آباد ءَ نندانک جنت ءُ زھرشانی کنت –
آئی ءِ گوشگ ات کہ ما یکرند ءِ پد ءَ گوں سرکار ءَ لوٹ کنیں کہ آ گوں سنجیدگی ءَ لوٹاں بہ منّیت اگان ناں اشی ءِ ھرابیں رزلٹ ءِ درکیت ءُ آئی ءِ زمہ دار سرکاریں –

آئی ءَ گوشتگ کہ ما اے پریس کانفرنس ءَ چہ بلوچستان ءِ کلیں راج ءَ، سیاسی گل، سول سوسائٹی، نودربر گل، ڈاکتر ءُ وکیلاں ءُ دگہ تک ءُ پھناناتاں سیادی داروکیں مردماں لوٹ کنیں کہ وتی ھاموشی ءَ ھلاس بہ کن انت پُرایمنیں زھرشانی ءِ بھر بہ بنت اے زوراکیانی بگیری ءَ توار چست بہ کن انت –

گڈسر ءَ بلوچ یکجھتی کمیٹی ءَ بلوچستان ءِ سرجمیں راج ءُ سیاسی تاکتاں چہ لوٹ کتگ کہ ھوشاپ ءِ شھید بوتگیں زھگانی کھول ءِ گوم ءَ یکجھتی کنگ ءِ ھاتر ءَ باند ءَ چہ وتی دمگاں زھرشانی بندات بہ کن انت ءُ شال ءِ درسیں شاھدگاں روگ ءُ آیگ ءِ راھاں سرجمی ءَ بند بہ کن انت –