دوازدہ سالاں پد بیگواھیں مردمے یل بوتگ، یل بیتگیں مردم ءِ یاداشت ھم شُتگ

بلوچستان ءِ دمگ آواران مشکے ءِ جھمنند دوازدہ سالاں بیگواھی ءَ پد یل بوتگ –

ھمے ماھے اولی ھپتگ ءَ ڈیرہ بگٹی ءَ چہ یک مردمے ءَ چاگردی ترامجاھاں اے مرد ءِ اکس شنگ کُرتگ ءُ گوشتگ ات کہ بیگواھیں مردم ءِ یل کنگ بوتگ بلے آئی ءِ یاداشت شُتگ ھمے ھاتر ءَ وتی گِس ءُ کھول ءِ مردمانی درگت ءَ ھچ گوشگ ءَ نہ انت –

بازیں مردم ءَ ھمے گوشتگ ات کہ اے مرد بلوچ نودربر گل آزاد ءِ رھشون زاکر مجید بلوچ انت کہ آئی ءِ زورانسری آوار جنی ءَ دوازدہ سال ءَ گیش انت –

بلے مروچی بلوچستان ءِ آنلائن رسانک ریڈیو زرمبش ءَ داتگ کہ اے مرد بیگواھیں نصراللہ بلوچ انت ءُ مشکے نوکجو ءِ جھمنند انت کہ دوازدہ سال پیسر آوار جنگ ءُ بیگواہ کنگ بوتگ – دوازدہ سالانی دراجیں وھد ءَ بیگواہ بوھگ ءَ آئی ءِ یاداشت شُتگ ءُ آئی ءِ جان ءِ سر ءَ بازیں لٹ کُٹ ءِ نشان ھم ھست انت –

یل بوتگیں نصراللہ بلوچ ءِ برات ءَ ترامجاھاں شنگ بوتگیں اکس ءَ پد وتی برات ءِ شوھاز ءَ شُتگ آئی ءِ سر ءَ ٹپ ءَ چہ آئی پجار کتگ –

زانگ بہ بیت بلوچستان ءَ چشیں بازیں مردمے یل کنگ بوتگ کہ آھانی یاداشت شتگ –

ھمے وڑءَ گوستگیں سال ءَ بلوچستان ءِ دمگ ڈیرہ دگہ یک مردمے یل کنگ بوتگ ات چاگردی ترامجاھاں ھمے گوشگ بوتگ ات کہ سمیر بلوچ بوتگ کہ پنچ مئی دوھزار سینزدہ ءَ مند ءَ زورانسری آوار جنگ ءُ بیگواہ کنگ بوتگ –

پد ءَ رند ءَ سمیر بلوچ ءِ کھول ءَ اے گپ راست کتگ ات کہ ھو سمیر بلوچ بوتگ بلے دوبر گار انت تنی وھدی مالوم نبوتگ کجا شتگ – بازیں مردمے ءِ ھمے گوشگ انت کہ دوبر پاکستانی پوج ءِ چیریں ادارھانی کارمنداں آوار جتگ ءُ بیگواہ کتگ بلے تنی وھدی اے گپ راست کنگ نہ بیتگ –