نوید بلوچ ءِ بیگواھی: کھول گورنر ھاؤس ءِ دیم ءَ نندانک ءَ نشتگ اَنت

بلوچستان ءِ بنجاھی شھر شال ءَ یازدہ اکتوبر ءَ سی ٹی ڈی ءِ دست ءَ آوار جنگ بیتگیں نوید بلوچ ءِ کھول گورنر ھاؤس ءِ دیم ءَ نندانک ءَ نشتگ اَنت –

نوید بلوچ ءِ برات ءَ رسانکدراں تران کنان ءَ گوشتگ کہ ما اے جاہ ءَ ھمے واستا اتکگ اِنت کہ کسے مئے توار گوشداشت بہ کنت –

آئی ءَ گُشتگ کہ منی برات ھما وھد ءَ گرگ بیتگ کہ یازدہ اکتوبر ءِ شپ ءَ پاکستانی سی ٹی ڈی ءَ مئے لوگ ءَ بیڑ برتگ ءُ اود ءَ سی ٹی ڈی ءَ مئے سرجمیں لوگ ءِ مردم جتگ اَنت ءُ منی پاد ھم پروشتگ –

آئی ءَ گُشتگ کہ مارا اے گوشگ بہ بیت کہ مئے کسور چی اِنت اے وڑ ءَ ابید ءِ ارزی نام ءُ دگہ ھال دیگ ءَ لوگ ءِ سر ءَ اُرش کنگ ءُ مئے ننگ ءُ ناموس ءَ لگتمال کنگ ءُ زالبولانی جنگ اے کجام دودانی رھبند اَنت؟ –

آئی ءَ گُشتگ کہ ما سرجمیں کھول ءِ مردم اد ءَ اتکگ ءُ نشتگ اِنت ءُ منی مات تنی وھدی بے ھوش اِنت نادراہ جاہ اِنت –

آئی ءَ گُشتگ کہ ھچ چوشیں دود نیست کہ کسے بیت ءُ مھلوک ءِ لوگانی سر ءَ بیڑ برگ ءُ زالبولانی جنگ ءُ دودماناں لگتمال کنگ –

آئی ءَ گشتگ منی برات یلو کنگ بہ بیت ءُ اے زوراکی مارا گوشگ بہ بنت –

زھرشانی ءَ انسا بلوچ کہ نوید بلوچ ءِ گوھار اِنت ءُ آئی ءَ گُشتگ اے دومی بر اِنت من پد ءَ دگانی سر ءَ گوں ھرساں اتکگ اَنت –

آئی ءَ گُشتگ کہ من دوھزار ءُ ھبدہ ءَ ھم ھمے دگانی وتی برات عامر ءِ یلو کنگ ءَ در پہ در بیتگ اَنت ءُ پد ءَ یک رندے اتکگ اَنت ءُ وتی برات ءِ یلو کنگ ءَ-

زانگ بہ بیت گوستگیں روچ ءَ نوید بلوچ ءِ بیگواھی ءِ ھلاپ ءَ شال ءِ پریس کلب ءِ دیم ءَ ھم زھرشانی کنگ بیتگ اَت کہ زھرشانی ءَ بازیں کچے ءَ مردماں بھر زرتگ اَت-