بلوچ نودبر راھشون ڈاکٹر صبیحہ بلوچ ءِ برات ءُ ناکوزتک ءِ زورانسری آوار جنی بلوچستان ءَ توار چِست کنوکانی بے توار کنگ ءِ ریاست ءِ پالیسانی درچ اِنت – اے ھیال ءُ لیکہ وائس فار بلوچ مسنگ پرسنز وائس چیئرمین ماما قدیر بلوچ ءَ وتی درشان ءِ تہ ءَ گْوشتگ اَنت-
ماما قدیر بلوچ ءِ گْوشگ اِنت بلوچ اسٹوڈنٹس ایکشن کمیٹی ءِ سروک ڈاکٹر صبیحہ بلوچ ءِ برات شاہ میر بلوچ ءُ 19 جون2021 ءَ ءُ ناکوزتک مرتضیٰ بلوچ 22 ستمبر 2021 ءَ زورانسری آوار جنگ ءَ پد کھول ءِ توار چست کنگ ءَ ورنایاں تاوان دیگ ءِ بیھار داتگ اَنت-
مرتضیٰ زھری اشی ءَ چہ ساری 2009 ءَ زورانسری آوار کنگ ءُ بیگواہ بیتگ ءُ دو ماہ ءَ رند یل کنگ بیتگ وھدے کہ ھمے سال ءَ نُھ ستمبر ءَ بیگواہ کنگ ءَ پد ھپدہ ستمبر یل کنگ ءُ چار روچ ءَ رند 22 ستمبر ءَ سَیمی رند ءَ زورانسری آوار جنگ ءُ بیگواہ کنگ بیتگ-
ماما قدیر بلوچ ءَ دیمتر ءَ گْوشتگ کہ اے وئیلاں چہ پدر بیت کہ بلوچستان ءَ پاکستانی فوج ءُ چیریں ادارہ بے لگام اَنت – آ ھر وھد ءَ کجام جاہ ءَ آیانی دل بہ لوٹ اِیت آ چست کن اَنت ءُ گاڑی ءِ تہ ءَ دور دے اَنت پد ءَ آئی ءِ درگت ءَ ھچ وڑیں سرپدی دست نہ کپ اِیت-
آئی ءَ دیمتر ءَ گْوشتگ کہ بلوچستان ءَ اے وڑیں ازیت ءُ سزا یکشل ءَ بازیں سالاں برجاہ ءَ اَنت – اے پالیسی ءِ سر ءَ بلوچستان ءَ سُرپُرکنوکیں نودربر ، چاگردی باسک ، سیاسی باسکاں نشانگ کنگ اَنت – ڈاکٹر صبیحہ بلوچ ءَ ھم اے پالیسی ءِ سر ءَ ریاست ءِ نیمگ ءَ ازیت دیگ بوگ ءَ اِنت کہ من آئی ءَ ایر جن آں-
ماما قدیر بلوچ ءَ گْوشتگ بلوچ بیگواھیں مردمانی کھول ، سیاسی ءُ چاگردی باسک ءُ دگہ پڑ ءَ سیادی داروکیں مردماں گوں دزبندی کن آں کہ آ بیگواہ کنگ بوتگیں ورنایانی ھاتر ءَ شال ءَ بؤکیں زھرشانی ءَ گیش ءَ چہ گیش بھر بزور اَنت ءُ اشاں چہ ھوار دگہ بیگواھیں مردمانی پہ سلامتی یل کنائینگ ءِ ھاتر ءَ توار چِست بہ کن اَنت-