بساک ءِ چیئرمین صبیحہ بلوچ ءِ برات ءُ ناکوزتک بیگواہ

بلوچ اسٹوڈنٹس ایکشن کمیٹی ءِ چیئرمین ڈاکٹر صبیحہ بلوچ ءِ برات ءُ آئی ءِ ناکوزتک بیگواہ کنگ بیتگ اَنت کہ اشی ءِ راستی بساک ءَ کرتگ –

آیانی گوشگ اِنت کہ نودربر رھشون ڈاکٹر صبیحہ ءِ برات شاہ میر بلوچ نوزدہ جون دوھزار ءُ بیست ءُ یک ءَ انجینئرنگ یونیورسٹی ھزدار ءَ چار ھمراھانی ھمراھی ءَ بیگواہ کنگ بیتگ پد ءَ آئی ءِ ھمراہ یلو کنگ بیتگ اَنت بلے شاہ میر انگت ءَ بیگواہ اِنت –

ھمے رنگ ءَ ڈاکٹر صبیحہ ءِ ناکوزتک بیست ءُ پنچ جون دوھزار ءُ بیست ءُ یک ءَ دزگیر کنگ ءَ پد بیگواہ کنگ بیتگ –

گرگ بیتگیں ھردوکیں ورناہ تنی وھدی بیگواہ اَنت – چاگردی رسانکجاھاں جتا جتائیں پھناتاں بندوکیں مردم اے وئیل ءَ ھمک روچی بیتگیں سزاھانی درچ گوشگ ءَ اَنت –

ایکٹوسٹ سمیر بلوچ ءَ اے درگت ءَ ٹوئٹر ءَ نبشتگ کرتگ کہ شاہ میر زھری ءُ مرتضیٰ زھری ءِ بیگواہ کنگ ریاستی ادارھانی نیمگ ءَ بلوچ ورنایانی زورانسری آوار جنی ءُ زُلم ءُ زوراکیانی برجم کنگ ءِ درچ گشتگ، ھمک روچ بلوچ ورنا کجام نا کجام رنگ ءَ زورانسری لَٹ ءُ کُٹ ءُ بیگواھیانی آماچ کنگ بیگ ءَ اَنت دراھیں انسانی ھکانی گل اے زوراکیانی نیمگ ءَ چماں پچ بہ کن اَنت –

بساک کراچی ھنکین ءِ سیکرٹری جنرل پیر جان بلوچ ءَ گُشتگ کہ ڈاکٹر صبیحہ ءِ برات ءُ آئی ءِ ناکوزتک ءِ آوار جنگ ءِ مول ءُ مراد کھول ءَ بے توار کنگ ءَ بلیک میل کنگ ءَ اَنت –

کلیم ارمان نامیں ورنایے ءَ نبشتگ کرتگ کہ بلوچ ءِ توار کجام نا کجام رنگ ءَ گٹگیر کنگ بیگ ءَ اِنت ڈاکٹر صبیحہ ءِ برات ءُ آئی ءِ ناکوزتک ءِ بیگواھی ھمیشی ءِ درچ اِنت –

گرگ بیتگیں ورنایانی بیگواھی ءِ ھال ءِ دیم ءَ آیگ یَ پد گوستگیں شپ ءَ ٹوئٹر ءَ #SaveZehriBrothers ھیش ٹیگ پاکستان ءَ ٹرینڈ بیتگ کہ ھزارانی کچ ءَ مھلوک ءَ وتی وتی ھیال درشان کتگ اَنت –