نبشتانک: راجی زُبان ءِ ھندی سْیاھگ
نبشتہ کار: ابدلستار بُگٹی
دی بلوچستان پوسٹ
انچوشکہ شُما سرپد اِت کہ من ءَ یک دو ماہ بیتگ کہ من ھندی ءِ آب دربُرتگ ءُ ھندی ءِ وانگ ھیل کتگ۔ گُؑڑا چہ ھندی ءِ وانگ ءُ دربرگ ءَ رند من ءَ مار ات کہ پہ راجی زُبان ءَ ھم ھندی ءِ سْیاھگے اڈ بہ کن آں کہ چہ اے کار ءَ راج ھم سرپد بہ بیت کہ بلوچی آبانی وڑ ءَ ھندی سْیاھگ ءَ ھم یکیں توارینک ءِ دو یا سے آب نہ بنت انچوشکہ اَربی سْیاھگ ءِ تہ ءَ توری “ز ، ژ، ذ، ض ءُ ظ” بہ بنت یا توری “ث، س ءُ ص” یا توری ” ع، ء، ا،ءُ ھ” بہ بنت ھمے داب ءَ “ھ ءُ ہ” بہ بنت۔ بزاں ھندی ءِ آب ھم کم اَنت ءُ سُرینوک ئِے ھم نیست اِنت۔ البت من راجی زُبان ءِ ھندی سْیاھگ پہ ھمے ھاتر ءَ اڈ نہ کُتگ کہ من کسے ءَ بلوچی ءَ ماں ھندی ءِ سْیاھگ ءَ وانینگ ءَ آں یا من سید رھبند ءِ اربی سیاھگ رَد کُتگ ءُ راج ءَ گْوشگ ءَ کہ شُما نمیرانیں سید ھاشمی ءِ اربی سْیاھگ ءِ رھبند ءَ یلہ بہ دے اِت انچوشکہ منی ھلاپ ءَ لھتیں بدواھیں مردم پوتاری کنگ ءَ اَنت۔
چوناھا راستی وَ ایش اِنت کہ راجی زُبان ءِ رواج گپتگیں رھبند نمیرانیں سید ھاشمی ءَ گوں اَربی سیاھگ ءَ ٹھینت ءُ من وت اَربی سیاھگ ءِ منّوگر آں کہ روایرشُتی ءُ رودرآتکی بلوچ نودربراں ماں وانگجاھاں اربی سْیاھگ وانینگ بیگ ءَ اِنت پمیشکا بلوچ راج وتی راجی زُبان ءِ نبشتہ سیاھگ ءُ رھبند ءَ وت ھیل گرگ ءَ اَنت۔ البت دری زُبان ءِ سْیاھگ دربرگ ءُ راجی زُبان ءَ ھم یک نوکیں سْیاھگے دیگ یک بلاھیں سببے ءُ اے بنی آدم ءِ بودی اَنت کہ یک مردمے ملٹی ٹیلنٹ بہ بیت۔
من ھندی ءِ سْیاھگ دربُرتگ بلے من راج ءَ اے وَ نہ گْوش آں کہ شُما راجی زُبان ءَ ھم گوں ھندی آباں نبیسّ ات چے ءَ کہ بلوچ راج ءَ ھندی نہ وانتگ ءُ نَیکہ بلوچ ءَ گوں ھندی ءَ سْیادی یے ھست ءُ نَیکہ مارا گوں ھند ءِ ھُشکنات ءَ کار ءُ داری یے ھست۔ ھر کس سرپد اِنت کہ بلوچ راج ءِ کِر ءُ کش ءِ ھمساھِگیں راج انچوشکہ دری، پارسی، پشتو، اُزبک، کُرد، سندھی ءُ سرائیکی دْراہ پہ وتی زُبانانی نبیسّگ ءَ اربی سْیاھگ کارمرز کن اَنت بلے بژن اِنت کہ لھتیں مردماں منی سر ءَ کَند اِت ءُ بدبُرتگ، لھتیں سنگتاں منی سر ءَ مسکرائی کُت ءُ بازین زھر بیتگ اَنت۔ یک سنگتے کہ نام ئِے داد اُلہ اِنت، گْوشت ئِے “بلے انگت منی وتی بلوچی سیاھگ راست نہ اِنت گڑا من کدی ھندی ءَ دربُرت کن آں ، گھتر ھمیش اِنت بلوچی سیاھگ ءِ سر ءَ کار بہ بیت” بلے اے واجہ اے ھم سرپد نہ بوتگ کہ من ھندی ءَ وانینگ ءَ نہ آں بلکیں یک سْیاھگے دیم ءَ آؤرتگ بلے من سنگت داد اُلہ بلوچ ءَ پسّو دات ءُ گْوشت کہ واجہ راجی زّبان ءِ اربی سّیاھگ سرجم ءُ پیلو اِنت۔ اربی سْیاھگ ءِ سرجمیں درونت ءُ کورس ھم ھست اَنت۔ من وت راجی زُبان ءَ اربی سْیاھگ ءِ منّوگر آں کہ نمیرانیں سید ھاشمی ءِ اربی سْیاھگ راجی زُبان ءِ رواج گپتگیں رھبند اِنت بلے پہ دزھُورکی ءُ مسکرائی ءَ من ھندی دربُرتگ ءُ من نی ھندی وانگ ءُ نبیسّگ ھیل کُرتگ۔ بلے من مار اِت کہ ھندی ھم راجی زُبان ءَ یک جْوانیں سْیاھگے دنت پہ اے ھاتر ءَ من راجی زُبان ءِ یک ھندی سْیاھگے ھم تیار کُت بلے ایشی ءِ اے مول ءُ مُراد وَ نہ انت کہ راجی زُبان ءِ اربی سْیاھگ گوں سید رھبند ءَ رِد اِنت! ھمے ڈول ءَ یک دگہ سنگتے کہ نام ئِے جلاب آسکانی اِنت، ھم یک مسکرائی جُستے کُتگ اَت “ھنچوش کہ اسلم کادر ءِ سْیاھگ ءَ رواج گپت گُڑا اے ھم رواج گیپت! نگبھت بات ئے مئے راج ءَ ھما سیاھگ ءِ سر ءَ سد سال جتگ انگت ٹریک ءَ درایان اِنت ایشی ءَ کجا در بارت تو مپت ءَ ٹیل سوچگ ءَ ئے لالا ستار ” گُڑا من سنگت ءَ مسکرائی پسّوے دات “جی ھو تو راست گْوشگ ءَ ئے بلے بلوچ راجدپتر ءِ تہ ءَ اے ھم نبشتہ بیت کہ نمیرانیں واجہ ابدلستار بُگٹی ءَ راجی زُبان ءِ ھندی سْیاھگ اڈ کُتگ اَت”-
بلے من واجہ سابت تگرانی ءِ منّتوار آں کہ ھمے سنگت ءَ ھم ھندی آب ونتگ ءُ دربُرتگ اَنت۔ وھدے کہ واجہ ءَ منی تیار کُتگیں ھندی سْیاھگ ءِ بلوچ درونت چار اِت اَنت گُڑا نبشتگ ئِے “جوانیں کارے کسے ءَ دردبرگ ءِ ھُب ھست در بہ بارت ئِے بلے واجہ پہ بلوچی سیاھگ ءَ سید ءِ گچین کُتگیں سیاھگ جْوان تِر اِنت ھمائی ءِ سر ءَ کار بہ بیت تو وَ انّو دربُرتگ بلے واجہ سید ءَ ھم ھندی ءَ دزرس بیتگ زیا بلوچ ءُ ایدگہ زُبان زانت ھم ھندی ءَ بلد اَنت۔ اگاں اد ءَ چیزے بیتیں وَ پیسر ءَ بیتگ اَت” من گوں واجہ سابت تگرانی تپاک کن آں کہ مارا سید رھبند دیم ءَ برگ لوٹ ایت کہ راج اربی سْیاھگ ءَ ھیل اِنت۔ بلے یک گپے وَ ھست کہ پہ بلوچی زُبان ءَ ھندی سْیاھگ چہ اربی سْیاھگ جْوانتر بیت انچوشکہ آب ئِے ھم کم اَنت ءُ دومی لھتیں پوتاری ھم ھلاس بیت کہ ما “مھمد، الہ بکش، ابدلکادر ءُ کاسم” ءِ نبیسّگ ءَ گُناھگار بَہ ایں۔
بلوچ راج شالا یکمُشت ءُ تپاک بہ بات، بلوچ راجی زُبان شالا مُدام دیمروئی بہ کنات، شالا انچوش بہ بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔