رامز خلیل ءِ کوش: کھول لاش ءِ ھمراھی ءَ شال ءَ سر بیتگ، زھرشانی برجاہ

بلوچستان ءِ دمگ کیچ ءِ ھند بلیدہ ءَ گوستگیں ھپتگ ءَ پاکستانی سیکورٹی پورس ءِ تیرگواری ءَ بیران بیتگیں کسان سالیں زھگ رامز خلیل ءِ کھول لاش ءِ ھمراھی ءَ سَے شمبے ءِ روچ ءَ بلوچستان ءِ بنجاھی شھر شال ءَ سر بیتگ اَنت –

سَے روچاں داں کھول ءَ تربت ءَ شبید فدا بلوچ ءِ چوک ءَ نندانک جتگ ءُ نشتگ اَنت، بلے سرکاری مزنیں واکاں آیانی لوٹ سرجم کنگ ءَ رھوت نہ کرتگ –

دو شمبے ءِ روچ ءَ کھول لاش ءِ ھمراھی ءَ شال ءِ نیمگ ءَ دراتک اَنت ءُ پنجگور ءَ گوزان، سوراب، کلات ءُ مستونگ ءَ داں شال ءَ سر بیتگ اَنت –

مستونگ ءِ ھد ءَ ڈپٹی کمشنر مستونگ ءَ کھول ءِ گون ءَ گپ ءُ تران ءُ واتر روگ ءِ دزبندی کرتگ، بلے کھول ءَ ھر رنگ ءَ شال ءِ روگ ءِ پیسلہ کرتگ –

جتا جتائیں جاھاں بلوچ راجدوست نودربر گل، سیاسی پاٹی ءُ سول سوسائٹی ءِ باسک ءُ دمگی مھلوک ءَ کھول ءِ گون ءَ ھمگرنچی درشان کرتگ ءُ کاروان ءِ ھمراہ بیتگ اَنت –

چہ مستونگ ءَ لاش ءِ گون ءَ مردمانی بازیں کچے ءَ شال ءِ شھر ءَ پترتگ اَنت اود ءَ بلوچستان شھدربرجاہ ءِ دیم ءَ نودربرانی بازیں کچے ءَ لاش ءِ دیم ءَ اتکگ اَنت ءُ پد ءَ کھول ءَ لاش چِست کرتگ ءُ ریڈ زون ءَ گورنر ھاؤس ءِ نزیک ءَ سر بیتگ اَنت –

کھول ءُ مھلوک ءِ بازیں کچے ءَ اے وھد ءَ گورنر ھاؤس ءِ نزیک ءَ نشتگ ءُ نندانک ءَ نشتگ اَنت –

زانگ بہ بیت دو اکتوبر ءَ تھسیل بلیدہ ءَ سی ٹی ڈی ءَ بی ایس او ءِ چیئرمین ظریف رند ءِ لوگ ءَ بیڑ برتگ ءُ اود ءُ کسان سالیں زھگ رامز خلیل بیران بیتگ ءُ یک زھگے ءُ زالبولے زدگ بیتگ اَت ءُ خلیل رند پورس ءَ وتی ھمراھی ءَ برتگ اَت –

اے وئیل ءَ پد سرکاری تکاں اے گوشگ بیتگ کہ ھردوکیں نیمگاں تیرگواری ءِ سبب ءَ اے زھگ ءِ بیرانی بیتگ –

بلے کھول ءَ اے دراھیں بھتام رد کرتگ ءُ انساپ ءِ لوٹ کرتگ –

ھمے وڑ وئیل ءَ دزگیر بیتگیں خلیل رند مروچی زمانت ءِ سر ءَ یلو بیتگ ءُ تربت ءَ سر بیتگ-