اسما بلوچ ءِ برات یلو کنگ بیتگ ءُ آئی ءِ پت انگت بیگواہ

سر بیتگیں ھالانی رد ءَ ھمے سال ءِ یازدہ اگست ءَ پنجگور ءَ کراچی ءَ روگ ءِ وھد ءَ پاکستانی پوج ءِ دست ءَ گرگ بیتگیں نجیب جمیل یلو کنگ بیتگ ءُ وتی لوگ ءَ سر بیتگ –

نجیب ءِ یل کنگ ءِ ھال آئی ءِ گوھار اسما بلوچ ءَ چاگردی رسانکجاھاں راست کرتگ –

اسما بلوچ ءَ گشتگ کہ منی براے مروچی زنداناں یل بیتگ ءُ وتی لوگ ءَ سر بیتگ بلے اشی ءِ ھواری ءَ ھشت سالاں بندیگیں منی پت ءِ ھواری ءَ دراھیں بندیگ یل کنگ بہ بنت –

زانگ بہ بیت نجیب جمیل ھمے سال ءِ یازدہ اگست ءَ پنجگور ےَ دیم پہ کراچی ءَ روگ ءِ وھد ءَ رخشان کور ءَ سرادک چیک پوسٹ ءَ پوج ءَ بس ءَ ایر گپتگ ءُ بیگواہ کرتگ اَت-

آئی ءِ بیگواھی ءِ ھلاپ ءَ آئی ءِ گوھار اسما بلوچ ءَ شال ءُ کراچی ءَ زھرشانی درچ بندات کتگ اِت اَنت ءُ مروچی آئی ءِ برات یلو بیتگ –

اسما بلوچ ءَ دراھیں بلوچستان ءَ دراھیں پھناتاں توار چِست کنوکیں مردمانی منت گپتگ ءُ گشتگ کہ آیاں منی برات ءِ یل کنائینگ ءَ مئے توار جوڑ برزتر کرتگ –

زانگ بہ بیت اسما بلوچ ءِ پت جمیل رھمت بیست ءُ نُھ اپریل دوھزار ءُ سیزدہ ءَ پاکستانی پوج ءَ آواران ءَ چہ لوگ ءَ چِست کرتگ ءُ بیگواہ کرتگ کہ آئی ءِ بیگواھی ءَ ھشت سال گوستگ –