بلوچستان ءِ بنجاھی شھر چہ شال ءَ پاکستانی لشکریانی دست ءَ دزگیری ءَ پد بیگواہ بیتگیں دو مردم آجو بیتگ اَنت۔
آجو بیتگیں مردمانی تہ ءَ منیر اھمد زھری گوستگیں ماہ ءَ سی ٹی ڈی ءُ دگہ پھازگی لشکریاں برما ھوٹل شال ءَ ھما وھد ءَ دزگیر کُتگ ءُ بیگواہ کُتگ کہ آ اود ءَ جھمنند بیتگ۔ اُستاد منیر ءِ یل بیگ ءِ ھال ھندی اھوالکاراں ھم سدکی کُتگ۔
اھوالانی رد ءَ گوستگیں ماہ ءَ چہ شال ءَ بیگواہ بیتگیں خضدار ءِ ھنکین زھری ءِ جھمنند اُستاد منیر اھمد آجو بیتگ ءُ لوگ ءَ سر بیتگ۔
بلوچستان ءَ زوریں بیگواھیانی وئیل مدام نبشتہ بنت۔ خضدار زھری ءِ جھمنندیں دو ورناہ عرفان زھری ءُ قادر کنول ھم گوستگیں ماہ ءَ زوریں بیگواھی ءِ آماچ بیتگ اَنت کہ داں انگت یل کنگ نہ بیتگ اَنت۔
بلوچستان ءَ بیگواھیں مردمانی جیڑہ روچ پہ روچ گنتر بیان اِنت۔
بلوچستان ءِ سیاسی پاٹی ءُ گلانی نیمگ ءَ مزنیں مدتے ءَ چہ بیگواھیں مردمانی آجوئی ءِ ھاتر ءَ جھد کنگ ءَ اَنت وھدیکہ دومی نیمگ ءَ شال پریس کلب ءِ دیم ءَ گوستگیں یک دھکے ءَ بیگواھیں مردمانی کھول ھم زھرشانی کنگ ءَ اَنت۔
دومی نیمگ ءَ چار ستمبر ءَ چہ شال ءَ لشکریانی دست ءَ بیگواہ بیتگیں منیب بڑیچ ھم یل بیتگ ءُ لوگ ءَ سربیتگ۔
منیب بڑیچ چار ستمبر ءَ پاکستانی لشکریاں شال سریاب دگ ءِ سر ءَ بلوچستان مزن شھدربرجاہ ءِ دیم ءَ بستگیں میتگ شفیع کالونی ءِ یک لوگے ءِ سر ءَ بیڑ بُرتگ ءُ دزگیر کنگ ءَ پد بیگواہ کُتگ اَت۔
منیب بڑی شال ڈگری کالج ءَ ایف ایس سی ءِ نودربر اِنت۔