نبشتانک: داں کد؟
نبشتہ کار: ابرَم بلوچ
دی بلوچستان پوسٹ
رپت اَنت ھما دور ءُ نوبت کہ بلوچ وتی دودانی رکینگ ءِ ھاتر ءَ دشمن ءِ دیم ءَ چوں البرز ءِ کوہ ءَ مِک بیتگ انت ، رپت اَنت ھا واجھی واھگ کہ پہ مڈا ءُ شان دستار بستگ ءُ چو پھوال ءَ زمین زادگ ءِ پیم ءَ گشتگ ءُ آجوئی ءِ مُرگانی لد ءَ گوں ھم توار بیتگ انت ءُ توار دگہ در ءِ پدر بیتگ ، رپت اَنت ھما نا سرجمیں واھگ کہ وتی ڈیھ ءُ آؤکیں پدریچ ءِ مھکمیں باندات ءِ واستا ودان بیتگ انت ۔
ءُ اے واھگانی گار ءُ بیگواہ ءُ کَل کنوک مئے جِند اِنت ، اھد ءِ مردماں گوشتگ کہ ” وھدے یک راجے وتی ھک ءِ ھلاپ ءَ جنگ نہ کنت آئی ءِ گار ءُ بیگواھی الم اِنت ” بلوچ ءِ انیگیں جاور ھمے پیم ءَ اَنت زلم ءِ ھلاپ ءَ گپ کنگ ءَ مئے دپ پچ نہ بنت وتی باریگ ءِ ودار کنگ ءَ ایں کہ کد اے زوراکیں لشکر ءِ چم مارا سک بہ بنت ءُ وتی زوراکی ءَ مئے کھولانی مردمانی سر ءَ چو آس ءِ بہ گوار ایت نو ما وتی دپاں پچ کنیں۔
شھید ھیات ، شھید ملک ناز، شھید کلثوم، شھید شاہینہ شاھین، شھید تاج بی بی، شھید جلیل پرکانی، شھید یاسر ءُ شھید رامیز ءِ درستانی مرگ پہ سرجمیں بلوچ راج ءَ ھمے کلوہ ءَ دیگ ءَ اِنت کہ انو اگاں نہ گڑا کدی زلم ءُ زالم ءِ ھلاپ ءَ گپ نہ کنیں ءُ داں کد وتیِ ودار ءَ کنیں.
زالم یک برے زلم ءِ آماچ ءُ لگت مالیں کوم ءَ چکاس ایت ءُ وھدیکہ دژمن اے چیز ءَ ٹِک کنت ءُ پھم ایت کہ اے راج گُنگ اِنت زالم ءِ ھلاپ ءَ گپ جت نہ کنت ءُ ترس ءُ بیم ءِ آماچ اِنت گڑا آ وتی زوراکیاں ترند کنت وڑ وڑیں پندل ساز ایت وڑ وڑیں ھنر کنت نپر پہ وت در گیجی کہ اے زلم ءِ تک ءُ پنات گیشتر دراج بہ بنت ءُ ما وتی کار ءُ منزل ءَ گیشتر دیم ءَ رھادگ بہ کنیں۔
اے اولمی رند نہ اِنت کہ مئے دود لگتمال کنگ بیتگ اَنت چادر ءُ چار دیوالی پامال کنگ بیتگ اَنت ازت ءُ ننگ ءِ سر ءَ ارش کنگ بیتگ نوُں ما وت ءَ کجام شرم ءَ بلوچ بِہ لیکیں ؟ بس بلوچ ءِ گوشگ ءَ کس بلوچ نہ بِیت بلوچانی لھتے دود است اَنت راج دپتر ءَ مزن شرپیں نام ءِ واھند است انت کہ مارا پجار دے اَنت ءُ اے سکین ءَ دے اَنت کہ مارا کجام راہ پہ وت در گیجگی اِنت ءُ وھدے کہ بدواہ گوں مارا گُون جَنت گڑا آکبت کجام ھد ءَ داں بہ بیت اے سرجمیں دودانی بُنھشت ءَ مارا یک کُل راجے ءَ یک مشت ءُ ھم گرنچ بوگی اِنت چیا کہ نوں آ دور آ وھد ءُ آ نوبت اتکگ کہ مارا وتی آؤکیں پدریچ ءُ وتی گیرت ، شرپ ءُ ننگ ءُ ناموس ءِ رکینگ ءِ ھاتر ءَ جھد ءِ کاروان ءَ آوار بیگی اِنت ءُ وتا چہ دراھیں زلم ءُ زالم ءَ چہ رکینگی اِنت ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔